Norræna nemakeppnin fer fram dagana 16. til 18. apríl í Grythyttan í Svíþjóð, þar sem efnilegir nemar í matreiðslu og framreiðslu frá Norðurlöndunum koma saman til að etja kappi.

Keppnin var fyrst haldin árið 1981 og hefur síðan skipað sér fastan sess sem mikilvægur vettvangur fyrir unga fagmenn í greininni. Þar gefst þátttakendum tækifæri til að sýna færni sína, læra hver af öðrum og mynda tengsl yfir landamæri.

Keppnin er haldin til skiptis milli Norðurlandanna af samtökum í greininni, í nánu samstarfi við hótel- og matvælaskóla.  Með því er lögð áhersla á bæði faglega hæfni og menntun, sem gegna lykilhlutverki í framtíð veitingageirans.

Fréttayfirlit um Norrænu nemakeppnina.

Styrktarkvöldverður verður haldinn til heiðurs og stuðnings við Snædísi Xyzu Jónsdóttur, sem á dögunum tryggði sér sæti í úrslitum Bocuse d’Or, sem fram fara í janúar 2027 í Lyon í Frakklandi. Um er að ræða eitt stærsta verkefni íslenskrar matreiðslu á alþjóðavettvangi og undirbúningur þegar hafinn af fullum krafti.

Kvöldverðurinn fer fram á veitingastaðnum EIRIKSDÓTTIR laugardaginn 18. apríl næstkomandi og er liður í fjáröflun fyrir Snædísi og teymi hennar, sem keppir fyrir hönd Íslands í þessari virtu heimsmeistarakeppni einstaklinga í matreiðslu.

Nánar um viðburðinn hér.

Áhugasamir pizzabak­arar fá tækifæri til að láta ljós sitt skína síðar í vor þegar pizzakeppni verður haldin dagana 28. og 29. apríl 2026 í tilraunaeldhúsi ÓJK-ÍSAM. Keppnin er haldin í samstarfi við ítalska hveitiframleiðandann Polselli og verður keppt um vegleg verðlaun.

Fyrstu verðlaun eru sérlega eftirsóknarverð. Sigurvegarinn fær ferð til Ítalíu þar sem hann sækir námskeið hjá Polselli og fær jafnframt tækifæri til að heimsækja frægustu pizzastaði í Napólí. Auk þess verða veitt verðlaun fyrir þrjú efstu sætin í keppninni.

Keppnin byggir á skýrum reglum. Keppendur þurfa að nota Polselli hveiti við pizzugerðina og koma sjálfir með deigið og allt hráefni sem notað er á pizzuna, ásamt uppskrift. Hver keppandi fær 15 til 20 mínútur til að baka pizzuna. Að því loknu smakka dómarar pizzurnar og gefa þeim einkunn.

Áhugasamir geta fengið frekari upplýsingar um skráningu og reglur hjá Eggerti hjá ÓJK-ÍSAM. Hægt er að hafa samband í síma 856-2762 eða með tölvupósti á [email protected].

Worldchefs, áhrifamestu samtök matreiðslumanna í heiminum, verða með ráðstefnu, sýningu og keppni sem fram fer dagana 16.–19. maí 2026 í Newport í Wales.

Þema ráðstefnunnar að þessu sinni er „Pasture, Passion, Plate“, sem heiðrar ferðalag matarins frá uppruna til fullbúins réttar og undirstrikar hvernig matur tengir okkur öll – frá bónda til borðs, yfir landamæri og menningarheima.

Um 1.000 kokkar frá 110 löndum sækja ráðstefnuna, ásamt 30 alþjóðlegum fyrirlesurum og sérfræðingum úr atvinnulífinu. Þá verður jafnframt sýning 200 nýsköpunarfyrirtækja og sýnenda, og búist er við að viðburðurinn laði að um 6.000 þátttakendur víðs vegar að úr heiminum.

Global Chef keppnin fer fram samhliða ráðstefnunni, en þar mun Hinrik Örn Lárusson keppir fyrir Íslands hönd í Wales.

Heimasíða: www.worldchefscongress.org

Kynningarmyndband