Snædís keppir í Bocuse d´Or í stað Hinriks

Snædís Xyza Mae Jónsdóttir

Snædís Xyza verður næsti keppandi íslands í Bocuse d´Or Europe sem fram fer í Marseille 15. – 16. mars 2026.

Snædís Xyza Mae Jónsdóttir er yfirmatreiðslumaður á veitingastaðnum Fröken Reykjavík á Hótel Sögu í Reykjavík. Hún ólst upp á Dalvík og hefur unnið víða í matargerð. Hún er virkur liðsmaður í Íslenska kokkalandsliðinu, bæði sem fyrirliði árið 2020 þegar liðið hlaut þriðja sætið á Ólympíuleikum IKA í Stuttgart, og sem þjálfari liðsins 2023–2025, þar sem það vann til bronsverðlauna á Ólympíuleikunum IKA árið 2024.

Sigurður Helgason, Marlís Jóna Karlsdóttir aðstoðarmaður Snædísar, Snædís Xyza Mae Jónsdóttir og Viktor Örn Andrésson

Ferill Snædísar í eldhúsinu er glæsilegur en hún hóf ferilinn á Sushi Social, Apótekinu og Hótel Sögu þar sem hún útskrifaðist árið 2018. Hún var yfirmatreiðslumaður á Silfru hjá ION Hótel og stýrði eldhúsinu þar auk þess að taka við þjálfun Kokkalandsliðsins.

„Mér líst vel á þetta verkefni. Þetta verður krefjandi en það er draumur allra keppniskokka að fara í Bocuse d´Or,“

segir Snædís en tækifærið að fara kom óvænt upp eftir að Hinrik Örn Lárusson þurfti að segja sig frá verkefninu.

„Þetta kom óvænt upp. Ég var þjálfari kokkalandsliðsins og er búinn að segja upp störfum þar. Það er ekkert annað sem kemst að. Þetta er verkefni sem þarf að setja allan fókus á.

Marseille er í mars og stuttur fyrirvari en ég er með 100 prósent traust á góða þjálfara og við ætlum að fara af fullum krafti í verkefnið, enda stefnum við á lokakeppnina í Lyon 2027.“

Myndir: aðsendar