Kósýkvöldið reddað: Stökkar kjúklinga tortillur með buffalo sósu

Þessar stökku kjúklinga tortillur, öðru nafni kjúklinga taquitos, eru afskaplega einfaldur og fjótlegur huggulegheitamatur sem smellpassar yfir sjónvarpinu á kósýkvöldi. Ég nota tilbúinn eldaðan kjúkling til að flýta fyrir og eftirleikurinn er leikur einn. Það er mjög gott að bera fram kalda sósu eða sýrðan rjóma til hliðar.

Stökkar kjúklinga tortillur með buffalo sósu og rjómaosti

(Fyrir 4 sem aðalréttur)

350 g eldaður kjúklingur

200 g rjómaostur til matargerðar frá Gott í matinn

100 g rifinn ostur

3-4 msk. sterk buffalo sósa

4 vorlaukar

8 meðalstórar tortilla kökur (eða 12-16 litlar)

1 msk. olía

Salt og pipar

Límóna, kóríander

Sýrður rjómi, gráðosta-, hvítlauks- eða önnur köld sósa eftir smekk

Aðferð:

Hitið ofn í 180 gráður með blæstri.

Rífið kjúklinginn niður eða skerið smátt.

Skerið vorlaukinn smátt.

Blandið kjúklingi, rjómaosti, rifnum osti, buffalo sósu og vorlauk saman í skál og smakkið til með salti og pipar.

Skiptið blöndunni jafnt á tortilla kökurnar og rúllið upp.

Leggið vefjurnar á bökunarplötu, penslið með smá olíu og bakið í 15-20 mínútur eða þar til gullinbrúnar og stökkar.

Berið fram heitar með kaldri sósu að eigin vali, límónubátum og auka buffalo sósu.