Forsetahjón hefja þriggja daga ríkisheimsókn til Svíþjóðar – Hafliði, Snædís og Marlís stýra tveimur viðburðum – Myndir

Forsetahjónin hófu formlega þriggja daga ríkisheimsókn til Svíþjóðar í morgun. Með í för eru utanríkisráðherra Þorgerður Katrín Gunnarsdóttir og heilbrigðisráðherra Alma Möller, ásamt opinberri sendinefnd og fulltrúum úr viðskipta- og menningarlífi.

Heimsóknin fer fram að boði Karls XVI. Gústafs konungs og Silvíu drottningar og er markmið hennar að styrkja þegar góð tengsl ríkjanna og efla samstarf á sviðum eins og heilbrigðismála, kvikmyndagerðar og öryggismála.

Samhliða heimsókninni fer einnig viðskiptasendinefnd til Svíþjóðar, undir forystu Íslandsstofu. Fulltrúar 30 íslenskra fyrirtækja taka þátt með áherslu á líftækni, nýsköpun og fjárfestingar.

Hafliði Halldórsson, Snædís Xyza Ocampo og Marlís Jóna Karlsdóttir bera ábyrgð á undirbúningi tveggja viðburða í tengslum við heimsóknina.

Í tilefni heimsóknarinnar var boðið til kvöldverðar í sendiherrabústað Íslands í Stokkhólmi í gærkvöldi.

Matseðill kvöldsins var sem hér segir:

Sjávarréttasúpa með súrdeigsbrauði og íslensku smjöri

Grillað lambafille með bok choi, shiitake sveppum og soðsósu

Skyr ganache með mysukaramellu og sítrónu marens

Á morgun 7. maí bjóða forsetahjón Íslands til móttöku í höfuðborg Svíþjóðar, til heiðurs sænsku konungshjónunum. Móttakan fer fram á veitingastaðnum K-märkt, sem staðsettur er í Garnisonen-byggingunni við Linnégatan 87F í Stokkhólmi.

Við þetta tilefni mun íslenska kokkalandsliðið bera fram kræsingar úr fyrsta flokks íslensku hráefni, þar sem Hafliði, Snædís og Marlís sjá um matreiðsluna.

K-märkt er rekinn af þekktum sænskum veitingamönnum: Daniel Roos pastry chef, vínþjóninum Jens Dolk og matreiðslukonunni Hönnu Normark.

Myndir: kokkalandslidid.is