Hjá Höllu fagnar átta ára afmæli eftir áföll og áskoranir

Sigurpáll Jóhannsson og Halla María Svansdóttir, eigendur Hjá Höllu, ásamt dóttur sinni.

Veitingastaðurinn Hjá Höllu við C hlið Keflavíkurflugvallar fagnar átta ára afmæli í dag, 12. október. Árin hafa verið viðburðarík og reksturinn staðið af sér fjölmargar áskoranir, allt frá gjaldþrotum flugfélaga og heimsfaraldri til eldgosa og flutninga á starfseminni.

Í færslu á Facebook síðu Hjá Höllu er farið yfir þessi átta ár, sem eigendurnir segja hafa einkennst af gleði, uppbyggingu, mikilli vinnu og ýmsum áföllum.

„Þessi átta ár hafa kennt okkur meira en við hefðum nokkurn tímann getað ímyndað okkur,“

segir meðal annars í færslunni.

Áföllin hafa verið mörg

Reksturinn fór erfiðlega af stað og fyrsta árið reyndist sérstaklega krefjandi. Síðan hafa ýmsir atburðir haft áhrif á starfsemina, meðal annars gjaldþrot flugfélaga, tafir á afhendingu Boeing MAX flugvéla og fækkun farþega um Keflavíkurflugvöll.

Þá hafði COVID faraldurinn mikil áhrif á reksturinn, líkt og hjá fjölmörgum öðrum fyrirtækjum í ferðaþjónustu og veitingageiranum.

En áskoranirnar voru ekki á enda.

Þegar eldgos hófst við Grindavík í nóvember 2023 þurftu eigendurnir að yfirgefa fyrri starfsstöð sína og finna nýjar leiðir til að sinna verkefnum fyrir flugvöllinn.

Í dag er Hjá Höllu með framleiðslueldhús í Sandgerði þar sem allur undirbúningur fyrir starfsemina á flugvellinum fer fram.

Gjaldþrot PLAY hafði mikil áhrif

Enn eitt áfallið reið yfir þegar flugfélagið PLAY varð gjaldþrota á síðasta ári. Hjá Höllu hafði séð um mat fyrir áhafnir félagsins og hafði gjaldþrotið því veruleg áhrif, bæði fjárhagslega og rekstrarlega.

Í færslunni benda eigendurnir á að þegar flugfélag hverfur af markaði tapist ekki aðeins verkefni og tekjur, heldur breytist einnig farþegaumferð um flugvöllinn.

„Stundum höfum við sannarlega spurt okkur hvernig við ættum að komast í gegnum næsta kafla en hér erum við enn,“

segir í færslunni.

Nýr veitingastaður í Smáralind

Þrátt fyrir erfiðleikana hefur starfsemin haldið áfram að þróast. Á síðasta ári opnaði Hjá Höllu annan veitingastað í Smáralind, sem eigendurnir segja hafa verið stórt og ánægjulegt skref eftir allt sem á undan hefur gengið.

Þau leggja áherslu á að á bak við reksturinn séu ekki aðeins fyrirtæki, verkefni og tölur, heldur tveir einstaklingar sem vinni hlið við hlið að sameiginlegum draumi.

Saga Hjá Höllu nær raunar lengra aftur en þessi átta ár, því alls eru liðin 16 ár frá því að eigendurnir hófu rekstur í Grindavík.

Á þeim tíma hefur starfsemin tekið miklum breytingum og þurft að aðlagast aðstæðum sem fæstir hefðu getað séð fyrir.

Þakklát fyrir stuðninginn

Á þessum tímamótum vilja eigendurnir sérstaklega þakka starfsfólki, viðskiptavinum og öllum þeim sem hafa stutt við reksturinn í gegnum árin.

„Við fögnum því ekki bara átta árum í rekstri, við fögnum því að hafa staðið af okkur stormana, lært af þeim og fundið styrk til að halda áfram,“

segir í færslunni.

Eigendurnir segjast reynslunni ríkari, með báða fætur á jörðinni og augun á næstu verkefnum.

Þótt framtíðin sé óráðin er eitt ljóst að þeirra mati.

„Ferðalagið heldur áfram.“

Myndir: Facebook / Hjá Höllu