Margrét Gunnarsdóttir sigraði í Kornax-nemakeppninni

Margrét Gunnarsdóttir frá Gulla Arnari sigraði í Kornax-nemakeppninni í bakaraiðn 2026. Hér stendur hún með sigurlaunin og hluta af keppnisverkefnum sínum.

Margrét Gunnarsdóttir frá Gulla Arnari bar sigur úr býtum í Kornax-nemakeppninni í bakaraiðn sem fór fram í Hótel- og matvælaskólanum í október. Alls tóku 15 bakaranemar þátt í forkeppninni og tryggðu sex þeirra sér sæti í úrslitum.

Keppnin fór fram í tveimur lotum. Forkeppnin var haldin dagana 14.–15. október og úrslitakeppnin 20.–21. október. Að keppni lokinni var haldin sýning í matsal Hótel- og matvælaskólans þar sem gestum gafst tækifæri til að skoða afrakstur keppenda.

Margrét Gunnarsdóttir í fyrsta sæti

Margrét Gunnarsdóttir frá Gulla Arnari hafnaði í fyrsta sæti, Raluca-Naomi Cupsa frá Sandholti varð í öðru sæti og Áslaug Margrét Alfreðsdóttir frá Hygge í því þriðja.

Auk verðlauna fyrir þrjú efstu sætin voru veitt sérstök verðlaun fyrir flottasta skrautstykkið og besta aðstoðarmanninn.

Raluca-Naomi Cupsa frá Sandholti hlaut verðlaun fyrir flottasta skrautstykkið og Arna Karen Gísladóttir frá Hygge var valin besti aðstoðarmaðurinn.

Keppnin haldin í 28 ár

Kornax-nemakeppnin hefur verið haldin óslitið frá árinu 1998 og er fyrir löngu orðin einn af stærri viðburðum innan íslenskrar bakaraiðnar.

Keppnin hefur skipað mikilvægan sess í námi bakaranema og má áætla að flestir bakarar sem hafa útskrifast frá aldamótum hafi einhvern tíma tekið þátt í henni.

Keppnin var haldin í samstarfi Hótel- og matvælaskólans, Kornax og Landssambands bakarameistara.

Þriggja manna dómnefnd

Dómnefndin að störfum

Dómnefnd keppninnar skipuðu Guðmundur Helgi Harðarson fyrir hönd Líflands, Ari Hermannsson frá 280 bakaríi og Kristín Hrund Reynisdóttir fyrir hönd Hótel- og matvælaskólans.

Meðfylgjandi myndir tók Ásgeir Þór Tómasson bakarameistari.