Nóg um að vera hjá félögum í Klúbbi matreiðslumeistara í Hell í Noregi

Meðfylgjandi mynd er frá Norðurlanda keppninni árið 2022:
F.v. Gabríel Kristinn Bjarnason, Aþena Þöll, Sveinn Steinsson og Sindri Guðbrandur Sigurðsson
Sindri Guðbrandur Sigurðsson hafnaði í 2. sæti í Matreiðslumaður Norðurlandanna árið 2022.
Gabríel Kristinn Bjarnason sigraði í keppninni Ungkokkur Norðurlandanna 2022.
Mynd: Brynja Kr Thorlacius

Það verður nóg um að vera félögum í Klúbbi matreiðslumeistara, en í þessari viku ferðast hátt í tuttugu félagar til Hell í Noregi þar sem keppnirnar um matreiðslumann Norðurlandanna, ungkokk Norðurlandanna og grænkerakokk Norðurlandanna fer fram ásamt þingi Norðurlandasamtakanna.

Í keppninni um matreiðslumann Norðurlandana (Nordic Chef of the Year) keppir Rúnar Pierre Heriveaux en hann vann keppnina um Kokk ársins 2022 og hlaut þannig réttinn til að keppa í Hell. Rúnar var yfirmatreiðsulmaður á hátíðarkvöldverði KM í janúar síðastliðnum. Rúnar starfar sem yfirmatreiðslumaður á veitingahúsinu ÓX, sem er annar af tveimur stöðum á Íslandi sem hafa hlotið Michelin stjörnu.

Guðmundur Halldór Bender keppir í keppninni um ungkokk Norðurlandanna (Nordic Young Chef of the Year) en Guðmundur útskrifaðist frá Hótel og matvælaskóla Íslands nú í maí. Hann var aðstoðarmaður Sigurjóns Braga Geirssonar í Bocuse d´Or keppninni í janúar síðastliðnum. Þrátt fyrir ungan aldur er þetta ekki fyrsta keppni Guðmundar, en hann var nemi ársins 2021 og í öðru sæti í Norrænu nemakeppninni 2022.

Sjá einnig: Stífar æfingar hjá Andreu fyrir framreiðslukeppni í Helvíti

Bjarki Snær Þorsteinsson og María Ósk Steinsdóttir keppa fyrir okkar hönd í keppninni um grænkerakokk ársins (Nordic Green Chef of the Year).

Bjarki starfar hjá Lux veitingum og er meðlimur í íslenska Kokkalandsliðinu sem mun keppa á Ólympíuleikunum í febrúar 2024. María er aðstoðarmaður hjá Kokkalandsliðinu og er fyrsta árs nemi hjá Lúx veitingum.

Á þinginu verður kosinn nýr forseti Norðurlandasamtakanna og eru tveir frambjóðendur; Marcus Hallgren frá Svíþjóð og undirritaður, Þórir Erlingson.

Á þinginu munu allir heiðursfélagar KM; Ib Wessman, Hilmar B. Jónsson og Lárus Loftsson mæta og verður gaman að hitta þá og ná mynd af þeim saman.

Þórir Erlingsson

Kær Kveðja,
Þórir Erlingsson,
forseti Klúbbs matreiðslumeistara.