Leitað að bestu ostakökunni og brauðtertunni

Undirbúningur fyrir hina árlegu brauðtertu- og ostakökukeppni á Selfossi er nú í fullum gangi, en keppnin fer fram þann 7. júní næstkomandi á Sjómannadaginn. Viðburðurinn hefur vaxið hratt á síðustu árum og er í dag orðinn einn stærsti kökuviðburður landsins.

Keppnin er haldin í samstarfi Kaffi Krús og Konungskaffi í miðbæ Selfoss. Keppendur baka kökurnar sínar heima og mæta síðan með þær á keppnisstað þar sem dómnefnd smakkar og velur sigurvegara í hverjum flokki. Vinningskökurnar fá í kjölfarið að rata tímabundið inn á matseðla beggja kaffihúsanna.

Keppnin hófst fyrir tólf árum sem einföld ostakökukeppni á Kaffi Krús en hefur síðan þróast í fjölmennan og vinsælan viðburð þar sem bæði áhugafólk og reynslumiklir bakarar taka þátt.

Í fyrra tóku um 17 keppendur þátt og aðstandendur búast við enn meiri þátttöku í ár. Nú þegar hafa tíu keppendur skráð sig til leiks.

Keppt verður í þremur flokkum. Fyrir bestu ostakökuna, bestu brauðtertuna og fallegustu kökuna þar sem útlit og framsetning vega þyngst.

Í verðlaun eru meðal annars ostakörfur frá MS auk hótelgistingar á Hótel Geysir, Hótel Vík og Hótel Örk. Þá fá allir keppendur einnig gjafabréf frá Kaffi Krús og Konungskaffi.

Skráning í keppnina fer fram hér.

Svipmyndir úr keppninni í fyrra

Þessar kökur kepptu til verðlauna árið 2025.

Sigurvegarar 2025

Frumlegasta kakan var ostakakan „Rabarbara- og engifer ostakaka“ eftir Önnu Höllu Hallsdóttur.

Verðlaun fyrir bestu ostakökuna hlaut Jónína Guðný Jóhannsdóttir fyrir kökuna „Sumarsæla“.

Steinunn Erla Sigurgeirsdóttir sigraði síðan í flokki bestu brauðtertunnar með „Skonsutertu með hangikjötssalati“.

Myndir: Facebook / Kaffi Krús