Frá eldhúsinu til heimsfrægðar: Anthony Bourdain á hvíta tjaldið

Anthony Bourdain

Fyrsta stiklan fyrir kvikmyndina Tony, sem byggð er á lífi bandaríska matreiðslumannsins og sjónvarpsmannsins Anthony Bourdain, hefur vakið mikla athygli frá því hún var birt á YouTube fyrr í þessum mánuði. Samkvæmt mbl.is hafa rúmlega tíu milljónir manna þegar horft á stikluna.

Myndin segir frá Bourdain á yngri árum, aðeins 19 ára gömlum, þegar hann var að stíga sín fyrstu skref í matreiðsluheiminum. Leikarinn Dominic Sessa, sem margir þekkja úr kvikmyndinni The Holdovers, fer með hlutverk Bourdain í myndinni. Með önnur hlutverk fara meðal annars Emilia Jones, Rich Sommer, Leo Woodall og Antonio Banderas. Áætlað er að myndin verði frumsýnd í ágúst.

Bourdain var um árabil yfirkokkur á veitingastaðnum Brasserie Les Halles á Manhattan og naut mikillar virðingar í faginu. Hann varð síðar heimsþekktur fyrir bækur sínar og ferðatengda matreiðsluþætti þar sem hann kynnti sér matarmenningu víða um heim.

Anthony Bourdain lést í júní árið 2018, 61 árs að aldri.

Mynd: úr safni