Hópuppsagnir hjá Hilton Nordica og Natura

Um þrjú hundruð starfsmönnum Hilton Nordica og Natura-hótelanna verður sagt upp á þriðjudag í næstu viku, samkvæmt umfjöllun Vísis. Uppsagnirnar eru liður í tilfærslu hótelanna frá Iceland Hotel Collection by Berjaya yfir til Íslandshótela.

Sjá einnig: Hilton Nordica og Reykjavík Natura fá nýjan rekstraraðila og andlitslyftingu

Starfsfólk Hilton Nordica var boðað á fund síðdegis í gær þar sem hópuppsögnin var kynnt. Samkvæmt heimildum Vísis ríkti óánægja meðal starfsfólks vegna skamms fyrirvara og óvissu um framhaldið, sérstaklega þar sem sumarið er annasamasti tími hótelanna.

Í fréttinni kemur fram að starfsfólk muni fá send skjöl til rafrænnar undirritunar á þriðjudag. Þá segir að óvissa hafi ríkt lengi um framtíð hótelanna eftir fréttir af yfirtöku Íslandshótela sem fyrst bárust árið 2025.

Stjórnendur Íslandshótela hafa áður sagt að allt starfsfólk verði endurráðið eftir yfirtökuna, en samkvæmt umfjöllun Vísis hefur það ekki verið staðfest beint við starfsfólkið.

Nánar má lesa um málið á visir.is.

„Gerum ekki ráð fyrir öðru en að ráða þetta fólk aftur inn til okkar“

„Við munum að sjálfsögðu koma fram af virðingu við þetta starfsfólk, margt hvert búið að vinna þarna mjög lengi þannig ða öllu þessu fólki verður boðið að koma í samtal við okkur og við gerum ekki ráð fyrir öðru en að ráða þetta fólk aftur inn til okkar,“

segir Davíð Torfi Ólafsson, forstjóri Íslandshótela í samtali við ruv.is, þar sem hægt er að lesa nánar um málið.

Mynd: úr safni