Starfsfólk veitingastaða boðið á BAR101 námskeið á Leynibarnum

Barþjónanámskeið verður haldið á Leynibarnum á Akureyri, við Hafnarstræti, fimmtudaginn 12. febrúar frá klukkan 19:30 til 22:00. Um er að ræða svokallað BAR101-námskeið sem ætlað er starfsfólki veitingastaða og er unnið í samstarfi við Barþjónaklúbb Íslands.

Farið verður yfir helstu grunnatriði barþjónustu, verklag og það sem skiptir máli í faglegri vinnu á bak við barborðið. Mekka Wines & Spirits stendur að námskeiðinu og mun Daníel Oddsson, fyrrverandi yfirbarþjónn á Jungle og núverandi starfsmaður fyrirtækisins, sitja fyrir svörum og veita innsýn í barsenuna í Reykjavík. Gestum gefst jafnframt kostur á að smakka úrval drykkja úr vörulínu Mekka Wines & Spirits.

Að kynningu lokinni verður efnt til hraðakeppni þar sem áhugasamir barþjónar keppa um að útbúa hinn klassíska Bacardi Daiquiri á sem skemmstum tíma. Sigurvegari kvöldsins fer ekki tómhentur heim.

Húsið opnar klukkan 19:30 með fordrykk og námskeiðið hefst klukkan 20:00. Áhugasamir geta skráð sig hér.

Aðstandendur vonast til að sjá sem flesta á Leynibarnum og eiga saman fræðandi og notalega kvöldstund.