Alexander Jósef stóð uppi sem sigurvegari með „Chris Pine“

Alexander Jósef Alvarado frá OTO fagnaði sigrinum í Three Cents – The Last Sip Showdown.

Alexander Jósef frá OTO stóð uppi sem sigurvegari í kokteilakeppninni Three Cents – The Last Sip Showdown sem fram fór á SKÝ Lounge & Bar miðvikudagskvöldið 16. september.

Tíu barþjónar kepptu til úrslita fyrir fullu húsi og kynntu hver sinn kokteil fyrir dómurum og gestum. Alexander sigraði með kokteilnum „Chris Pine“, Heimir Morthens frá Drykk varð í öðru sæti með „Latitude“ og Svanhvít Thea Árnadóttir frá Veður tók þriðja sætið með „G&TEA“.

Dómarar kvöldsins voru Sam Trevethyen, vörumerkjasendiherra, Elna María Tómasdóttir, varaforseti Barþjónaklúbbs Íslands, Jónína Unnur Gunnarsdóttir, heiðursfélagi Barþjónaklúbbs Íslands, og Róbert Aron Proppé, ein af skærari stjörnum íslensku barsenunnar.

Keppnin var sett upp með nokkuð óvenjulegum hætti. Á meðan DJ sá um tónlist fyrir gesti í hefðbundnu hljóðkerfi staðarins fór kynning keppendanna fram í sérstöku hljóðkerfi. Gestir sem vildu fylgjast með gátu sett á sig þráðlaus heyrnartól og heyrt alla kynningu keppandans án þess að stöðva tónlist eða annað sem var í gangi í salnum.

Gleðin leyndi sér ekki þegar Alexander Jósef frá OTO var kynntur sem sigurvegari The Last Sip Showdown.

Kerfið var prófað í fyrsta sinn á keppninni og kom vel út. Hugmyndin var að skapa meira líf í kringum keppnina og gera gestum kleift að velja sjálfir hvort þeir fylgdust náið með hverjum keppanda eða nytu einfaldlega stemningarinnar á staðnum.

Kvöldið snerist því um meira en aðeins úrslitin. Keppendur fengu vettvang til að sýna eigin stíl, hugmyndir og framkomu og gestir fengu að kynnast betur þeirri vinnu sem liggur að baki hverjum kokteil.

Keppendur kvöldsins fögnuðu saman eftir úrslitin.

Three Cents – The Last Sip Showdown var haldin í samstarfi við Three Cents, Coca-Cola Europacific Partners, SKÝ Lounge & Bar og Barþjónaklúbb Íslands.

Myndir; Barþjónaklúbb Íslands