Einföld og fljótleg karamellu ostakaka í glasi

Hver elskar ekki að geta borið fram ljúffenga ostaköku í glasi sem ekki þarf mikla fyrirhöfn. Þessa ostaköku tekur enga stund að útbúa, karamellan en einstaklega góð á móti ostakökunni og stökkum botni með piparkökum og pekanhnetum. Ekkert mál að gera daginn áður.

Innihald

6 skammtar

Botn
130 g piparkökur eða kanilkex
100 g pekanhnetur
50 g smjör

Ostakaka
400 g rjómaostur til matargerðar frá Gott í matinn
150 ml rjómi frá Gott í matinn, þeyttur
1 tsk. vanilludropar
70 ml karamella/karamellusósa, keypt tilbúin

Toppur
karamella
150 ml rjómi frá Gott í matinn, þeyttur
rest af piparköku og pekanhnetu blöndunni

Skref 1

• Setjið piparkökur eða kanilkex í matvinnsluvél og látið hana vinna þar til kexið er orðiðfín malað.
• Grófsaxið pekanhneturnar og blandið þeim saman við.
• Bræðið smjör og hrærið vel saman við.
• Setjið tvær kúfaðar matskeiðar í hvert glas og þjappið vel niður með botni af öðru glasi eða skeið. Setjið í kæli á meðan þið undirbúið ostakökuna.
• Geymið rest til að setja ofan á kökurnar í lokin.

Skref 2

• Þeytið 150 ml af rjóma og setjið til hliðar.
• Setjið rjómaost í hrærivél ásamt sykri, vanilludropum og tilbúinni karamellu og hrærið þar til blandan er orðin mjúk og slétt. Ef karamellan er mjög þykk er gott að setja hana inni í örbylgjuofn 10-15 sekúndur áður en henni er blandað saman við.
• Blandið rjómanum varlega saman við með sleif og hrærið þar til allt hefur blandast vel saman.

Skref 3

• Best er að setja rjómaostablönduna í sprautupoka og sprauta henni fallega ofan í hvert glas fyrir sig. Setjið ostakökuna inn í ísskáp í 2-4 klst.
• Áður en kakan er borin fram setjið 1-2 msk. af karamellu yfir hvert glas, þreytið restina af rjómanum og sprautið honum ofan á.
• Setjið loks afganginn af piparköku- og pekanhnetublöndunni yfir rjómann.
• Geymist í kæli þar til ostakakan er borin fram.

Höfundur: Thelma Þorbergsdóttir – gottimatinn.is