Marína Björk bakaranemi sigraði í kleinuhringjakeppninni

Allir keppendur í kleinuhringjakeppninni ásamt dómnefnd að keppni lokinni.

Hótel- og matvælaskólinn í Menntaskólanum í Kópavogi fagnaði 30 ára afmæli sínu með fjölbreyttri dagskrá á laugardaginn.

Meðal þess sem fór fram var spennandi kleinuhringjakeppni þar sem glæsilegir og fjölbreyttir kleinuhringir voru bornir fram fyrir dómnefnd.

Í dómnefnd sátu Pétur S. Pétursson, bakarameistari og söluráðgjafi hjá Bako Verslunartækni, Ásdís Kristjánsdóttir, bæjarstjóri Kópavogs, Unnar Þór, verkefnastjóri Samfélagslögreglunnar, og Billy Long, sendiherra Bandaríkjanna á Íslandi.

Keppnin var hörkuspennandi en að lokum stóð Marína Björk Halldórsdóttir, bakaranemi hjá Gulla Arnari, uppi sem sigurvegari og hlaut glæsileg verðlaun. Allir keppendur fengu jafnframt gjafapoka frá Bakó Verslunartækni með ýmsum vörum sem nýtast vel við bakaraiðn.

Haraldur Árni Þorvarðarson, fagstjóri bakaradeildar Hótel- og matvælaskólans, afhenti Marínu Björk Halldórsdóttur verðlaunin.

Nýjar rúlluvélar fyrir bakara framtíðarinnar

Bakaraiðndeild skólans tók nýlega í notkun fjórar nýjar RONDO Econom 4000 rúlluvélar frá Bako Verslunartækni. Vélarnar eru nettar en öflugar miðað við stærð og henta því vel við kennslu og þjálfun nemenda.

RONDO hefur verið leiðandi í þróun rúlluvéla og lausna fyrir lagskiptingu deigs frá árinu 1948. Vörumerkið er þekkt fyrir áreiðanleika og endingu.

Undir rúlluvélarnar voru sett sérsmíðuð borð frá Vitrum með fellanlegum hliðum. Sú útfærsla auðveldar flutning vélanna milli rýma og gerir jafnframt mögulegt að taka þær með á sýningar og keppnir.

Meðfylgjandi myndir tók Rúnar Hreinsson, mk.is.