Veitingastaðurinn Strikið rýmdur eftir að eldur kom upp

Veitingastaðurinn Strikið á Akureyri.
Mynd: Kristinn Jakobsson / Veitingageirinn.is

Slökkviliðið á Akureyri var kallað út laust fyrir klukkan 8.30 í morgun vegna elds á efstu hæð Alþýðuhússins við Skipagötu 14.

Samkvæmt frétt RÚV kviknaði eldur í millivegg við veitingastaðinn Strikið. Starfsmaður varð eldsins var og náði að ráða niðurlögum hans að mestu áður en slökkviliðið kom á vettvang.

Slökkviliðsmenn opnuðu vegginn og slökktu í þeim glæðum sem eftir voru. Húsið var rýmt á meðan á aðgerðum stóð en ekki reyndist þörf á að reykræsta það.

Aðgerðum lauk skömmu eftir klukkan 9.

Vigfús Ólafur Bjarkason, varðstjóri hjá Slökkviliði Akureyrar, sagði í samtali við RÚV að skjót viðbrögð starfsmannsins hefðu skipt höfuðmáli.