Mjólkursamsalan biðst velvirðingar á óstöðugleika á rjómaostinum

Undanfarið hafa staðið yfir breytingar á framleiðslulínunni á rjómaostinum hjá Mjólkursamsölunni og er markmiðið að koma með mýkri og betri rjómaost.

Sjá einnig:

Rjómaostur til matargerðar mýkri en áður

Osturinn átti ekki að tapa neinum af eiginleikum þess gamla heldur að bæta við, segir í tilkynningu frá MS. Ný vél var keypt í framleiðsluna enda var sú sem fyrir var komin vel á aldur og úrelt á marga vegu. Nýja framleiðsluaðferðin tryggir mun betri nýtingu á mjólkinni og framleiðsla á rjómaosti er því mun umhverfisvænni en áður.

Í vöruþróunarferlinu var mikil áhersla lögð á að prófa rjómaostinn í matargerð og bakstur og tókust þær tilraunir vel. Nú þegar framleiðsla er hafin með nýju vélinni þá hafa komið upp vandamál og hefur osturinn stundum verið of linur eða kornóttur. Í sumum tilvikum breytist áferðin á rjómaostinum þegar hann er hitaður.

Unnið er hörðum höndum að ná stöðugleika í framleiðsluna og MS þykir mjög leitt að sumir viðskiptavinir hafi fengið ost sem stóðst ekki væntingar. Margar gagnlegar ábendingar hafa borist frá neytendum og er reynt að koma til móts við sem flesta og vonandi verða allir sáttir að lokum.

Biðst MS velvirðingar á þeim óþægindum sem þessar breytingar hafa haft í för með sér og vonast er að þessir byrjunarörðugleikar heyri brátt sögunni til.

Auglýsingapláss

Mynd: ms.is