Opnað fyrir umsóknir í Hótel- og matvælaskólann fyrir vorönn 2027

Opnað hefur verið fyrir umsóknir í Hótel- og matvælaskólann í Menntaskólanum í Kópavogi fyrir vorönn 2027. Umsóknarfrestur er frá 1. til 31. október og fer innritun fram á innritun.is.

Á vorönn verða kenndir 1., 2. og 3. bekkur í matreiðslu, 3. bekkur í framreiðslu, 3. bekkur í bakstri og 3. bekkur í kjötiðn, að því gefnu að næg þátttaka náist. Þá verður einnig boðið upp á seinni önn í námi matsveina.

Ferilbók og handleiðsla meistara

Nemendur sem stefna á iðnnám í hótel- og matvælagreinum þurfa að hafa virka ferilbók og starfa undir handleiðslu meistara.

Til þess að geta innritast í viðkomandi bekk þurfa nemendur að hafa lokið ákveðnu lágmarkshlutfalli ferilbókarinnar. Hlutfallið er mismunandi eftir iðngreinum og bekkjum.

Ferilbókin þarf að vera útfyllt með texta, myndum og myndböndum og hver liður sem nemandi hefur lokið þarf að vera samþykktur af meistara. Aðrar reglur gilda um nemendur sem eru á pappírssamningum.

Í matreiðslu og framreiðslu þarf ferilbókin að vera 30% útfyllt fyrir 1. bekk, 55% fyrir 2. bekk og 80% fyrir 3. bekk.

Í bakstri og kjötiðn þarf ferilbókin að vera 45% útfyllt fyrir 1. bekk. Annar bekkur er bóklegur og því er ekki gerð krafa um ákveðið hlutfall ferilbókar. Fyrir 3. bekk þarf hún að vera 80% útfyllt.

Ferilbókin þarf að vera fullkláruð fyrir sveinspróf

Áður en sótt er um sveinspróf þarf ferilbókin að vera 100% útfyllt með texta, myndum og myndböndum. Meistari þarf jafnframt að hafa yfirfarið hana í heild sinni og samþykkt.

Sveinspróf eru haldin tvisvar á ári og er lokafrestur til að sækja um 1. apríl og 1. nóvember ár hvert. Mikilvægt er því að ferilbókin sé tilbúin tímanlega áður en umsóknarfrestur rennur út.

Umsóknarfrestur um skólavist fyrir vorönn 2027 er til 31. október.

Mynd: mk.is / Rúnar Hreinsson.