Þrír heimar viskís – frá Skotlandi til Japan og Taívan

Hvað sameinar viskí frá Skotlandi, Japan og Taívan og hvað gerir það ólíkt? Viskísérfræðingurinn Jacek Rudecki og Iðan fræðslusetur bjóða upp á námskeiðið „Þrír heimar viskís – Skotland, Japan og Taívan“ föstudaginn 2. október kl. 14–16 í Húsi fagfélaganna, Stórhöfða 29.

Á námskeiðinu verða smakkaðar fimm tegundir af viskíi í leiðsagðri samanburðarsmökkun. Skosk viskíhefð er útgangspunkturinn og skoðað hvernig hún hefur mótað framleiðslu í Japan og Taívan. Þótt aðferðirnar séu oft sambærilegar geta loftslag, þroskun og val á tunnum skilað afar ólíkum ilmi, bragði og karakter.

Þátttakendur þjálfast í að smakka, lýsa og bera saman viskí og öðlast hagnýta þekkingu sem nýtist við að kynna það og mæla með því fyrir gesti. Námskeiðið hentar því vel fagfólki í veitingageiranum og öðrum sem vilja kynnast fjölbreyttum heimi viskís.

Almennt verð er 21.500 kr., en félagsfólk Iðunnar greiðir aðeins 4.300 kr.

Nánari upplýsingar og skráning: Þrír heimar viskís – Skotland, Japan og Taívan