Þorskur í sparifötunum, stökkur ostahjúpur og sítrónukeimur

Einstaklega ljúffengur fiskréttur sem tekur enga stund að útbúa. Það er svo gott að nota fjögurra osta blönduna í þennan rétt því bragðmikill osturinn setur svo mikinn svip á réttinn. Í staðinn fyrir ostablönduna má líka rífa sjálfur niður t.d. sterkan Gouda eða Óðals Tind.

Með fisknum er ákaflega gott að bera fram nýbakað rúgbrauð með smjöri og létt salat.

Innihald
4 skammtar

800 g þorskhnakkar, 800-900 g
75 g smjör
1 stk. hvítlauksrif
1 stk. sítróna
2 1⁄2 dl panko brauðraspur
200 g 4 osta blanda (1 poki)
fersk steinselja, handfylli
salt og pipar

Meðlæti

rúgbrauð og ferskt salat

Aðferð:

Skref 1

• Hitið ofn í 200 gráður með blæstri.
• Bræðið smjörið við vægan hita, rífið eða hakkið hvítlauksrifið og bætið út í ásamt berki af einni sítrónu. Leyfið þessu að krauma í 1-2 mínútur og takið af hitanum.
• Bætið raspinum út í ásamt saxaðri steinselju og blandið vel saman.
• Hrærið að lokum ostinum saman við blönduna. Smakkið til með salti og pipar.

Skref 2

• Skerið fiskinn í passlega bita og raðið í eldfast mót. Saltið og piprið vel báðum megin.
• Setjið ostablönduna ofan á hvern bita og þrýstið aðeins niður. Það er allt í lagi þó blandan fari aðeins framhjá og á milli bitanna.

Skref 3

• Bakið þar til fiskurinn er eldaður í gegn og ostahjúpurinn gullinbrúnn. 15-20 mínútur.
• Berið fram með sítrónubátum, rúgbrauði, smjöri og fersku salati.

Höfundur: Helena Gunnarsdóttir – Gottimatinn.is