Tiramisú brownies með silkimjúku mascarpone kremi

Eftirréttir eða kökur sem innihalda bæði kaffi og súkkulaði er með því besta sem til er. Ef þið bætið svo mascarpone og rjóma í jöfnuna verður til eitthvað stórkostlegt sem enginn vegur er að standast. Þessar brownies eru einmitt þannig.

Innihald

115 g smjör
200 g 70% súkkulaði, saxað
3 stk. egg
70 g púðursykur
100 g sykur
2 tsk. vanilludropar
30 g kakó
60 g hveiti
1⁄2 tsk. sjávarsalt
1 msk. skyndikaffiduft, mulið

Mascarpone krem

250 g mascarpone frá Gott í matinn, við stofuhita
250 ml rjómi frá Gott í matinn
60 g flórsykur
1⁄4 tsk. sjávarsalt
1 msk. vanilludropar
2 msk. kahlua líkjör eða kaffi
• 2-3 msk. kakóduft til að dusta yfir

Aðferð:

Skref 1

• Byrjið á því að saxa súkkulaðið og setja það til hliðar. Hitið ofninn í 170°C með blæstri.
• Klæðið ferkantað form, 20x20cm með bökunarpappír.
• Setjið smjörið í pott og bræðið við vægan hita. Þegar það er alveg bráðið, slökkvið þá undir pottinum og bætið súkkulaðinu út í. Hrærið aðeins saman og látið standa.

Skref 2

• Setjið egg, púðursykur, sykur og vanilludropa saman í meðalstóra skál og þeytið saman þar til blandan er létt og ljós. Þetta gæti tekið um 5 mínútur.
• Blandið þá súkkulaðiblöndunni rólega saman við með sleikjunni með því að hella henni í mjórri bunu úr pottinum og skafa upp úr botninum og upp.
• Þegar allt súkkulaðismjörið er komið saman við sigtið þá kakó, hveiti, salt og mulið skyndikaffiduft saman við og blandið rólega saman við með sleikjunni.

Skref 3

• Smyrjið deiginu í formið og bakið í ca. 20-22 mín.
• Þegar brownies botninn er tilbúinn verður að kæla hann alveg áður en mascarpone kremið er sett yfir.

Skref 4

• Byrjið á því að setja mascarpone ostinn í skál og þeyta vel með handþeytara.
• Setjið rjómann í aðra skál og þeytið þar til hann byrjar að stífna en ekki þannig að hann sé stífþeyttur.
• Setjið þá ostinn saman við rjómann ásamt flórsykri, sjávarsalti, vanilludropum og líkjör eða kaffi.
• Þeytið vel þar til blandan er alveg kekkjalaus og líkist þykku kremi.

Skref 5

• Losið brownies botninn úr forminu en setjið hann svo aftur í formið á pappírnum.
• Smyrjið mascarpone kreminu yfir kaldan brownies botninn á meðan kakan er enn í forminu.
• Kælið.
• Dustið kakódufti yfir kremið, takið kökuna þá úr forminu og skerið í bita.

Höfundur: Valgerður Gréta Gröndal – gottimatinn.is