Pistasíu- og sítrónukaka sem bráðnar í munni

Mjúk og ilmandi pistasíu- og sítrónukaka þar sem djúpt hnetubragð og ferskur sítrónukeimur mætast í fullkomnu jafnvægi. Punkturinn yfir i-ið er silkimjúkt mascarpone rjómaostakremið sem gerir kökuna bæði létta, ferska og einstaklega freistandi. Tilvalin á veisluboðið um páskana eða með sunnudagskaffinu.

Pistasíu- og sítrónukaka með mascarpone rjómaostakremi

Innihald

kaka

170 g hveiti

1 tsk lyftiduft

½ tsk matarsódi

100 g pistasíukjarnar ferskir og ósaltaðir eða saltaðir (fer eftir smekk)

Börkur af tveimur sítrónum

120 g smjör við stofuhita

200 g sykur

½ tsk sjávarsalt

3 egg

60 g sýrður rjómi

80 ml mjólk

1 tsk vanilludropar

Mascarpone krem

200 g marscarpone rjómaostur frá Gott í matinn

100 g flórsykur

1 msk rjómi

1 msk rifinn börkur af sítrónu

1 msk ferskur sítrónusafi

Hakkaðir pistasíukjarnar ofan á kökuna

Aðferð

1. Setjið smjörpappír í hringlaga eldfast mót ca. 20 cm að stærð og hitið ofninn í 180 gráðu hita með blæstri.
2. Setjið smjör og sykur saman í skál og hrærið þar til blandan er orðin ljós og létt.
3. Bætið einu eggi saman við í einu og hrærið vel á milli. Gott er að skafa hliðarnar á skálinni hér.
4. Hakkið pistasíukjarna í matvinnsluvél þar til þeir eru orðnir fínsaxaðir. Passið þó að hakka þá ekki of lengi svo þeir breytist ekki í pistasíusmjör.
5. Setjið hakkaða pistasíukjarnana í skál ásamt hveiti, lyftidufti, matarsóda, salti og rifnum berki af sótrónu og hrærið vel saman.
6. Blandið þurrefnum saman við ásamt sýrðum rjóma, mjólk og vanilludropum.
7. Hrærið þar til allt hefur blandast vel saman og setjið í eldfast mót og bakið í 20 -25 mínútur eða þar til tannstöngull kemur hreinn upp úr miðju kökunnar.
8. Á meðan kakan er að bakast undirbúi þið kremið.
9. Takið kökuna út og leyfið henni að kólna við stofuhita áður en þið setjið kremið á svo kremið bráðni ekki.

Krem

1. Setjið öll hráefni saman í skál og hrærið þar til kremið verður slétt og fínt.
2. Smyrjið kreminu vel á kökuna og grófsaxið pistasíukjarna og setjið ofan á kremið.
3. Kakan er best við stofuhita en þarf að geymast í kæli þar til hún er borin fram.

Höfundur: Thelma Þorbergsdóttir