Sex nýir komust í hóp þeirra 299 sem bera virtasta titil vínþjóna í heiminum

Sex nýir Master Sommeliers sem hlutu hinn eftirsótta titil eftir lokapróf Court of Master Sommeliers í Vín.

Alþjóðasamtökin Court of Master Sommeliers (CMS) hafa veitt sex nýjum vínþjónum hinn eftirsótta titil Master Sommelier eftir krefjandi tveggja daga próf í Vín í Austurríki. Með því hækkar fjöldi þeirra sem bera titilinn í heiminum í 299.

Prófið fór fram á Grand Hotel í Vín í síðasta mánuði og samanstóð af bæði fræðilegum prófum og blindsmökkun. Að þessu sinni var einnig sögulegur áfangi þegar fyrstu Master Sommeliers frá Máritíus, Bosníu og Tékklandi hlutu titilinn.

Forstjóri Court of Master Sommeliers, Ronan Sayburn MS, óskaði öllum sem stóðust prófið innilega til hamingju. Hann sagði í tilkynningu að það væri sérstaklega ánægjulegt að sjá Bosníu og Tékkland bætast í hóp þeirra landa sem eiga Master Sommeliers.

Hann benti jafnframt á að flestir þátttakendur hefðu þegar staðist verklega hlutann og margir hefðu lagt á sig margra ára undirbúning. Sumir hefðu verið á námsleiðinni í allt að átta til tólf ár áður en markmiðinu var náð.

Þátttakendur í Master Sommelier prófinu komu saman í Vín áður en úrslitin voru kynnt.

Fyrstu fulltrúar nýrra landa

Meðal þeirra sem hlutu titilinn eru Reza Nahaboo, fyrsti Master Sommelier frá Máritíus, sem starfar við Hótel- og veitingaskólann í Lausanne í Sviss, Amar Boudjaoui, fyrsti Tékkinn sem nær þessum áfanga, og Suvad Zlatic, fyrsti Bosníumaðurinn til að hljóta titilinn. Hann býr nú í Austurríki og starfar sem vínráðgjafi.

Einnig náðu áfanganum Michele Fazari, ítalskur vínþjónn sem starfar hjá Jackson Family Wines og hefur áður starfað hjá 67 Pall Mall í London, Adam Michocki, víninnflytjandi búsettur í Leeds sem sérhæfir sig í vínum frá Mið Evrópu, og Michal Drozdowski, yfirvínþjónn á veitingastaðnum Bottiglieria 1881 í Póllandi.

Fagnar 50 ára afmæli á næsta ári

Árið 2027 verða liðin 50 ár frá stofnun Court of Master Sommeliers, sem var sett á laggirnar árið 1977. Samtökin starfa nú í 33 borgum í 23 löndum og hafa um áratugaskeið verið meðal áhrifamestu samtaka heims í menntun vínþjóna.

Síðar á þessu ári verður lokapróf Master Sommelier Diploma haldið í fyrsta sinn í Hong Kong og verður sú borg framvegis gestgjafi prófsins til skiptis með Ástralíu fyrir Asíu og Eyjaálfu.

Samkvæmt Ronan Sayburn er eftirspurn eftir náminu mikil á svæðinu og gert er ráð fyrir að um 45 þátttakendur taki lokaprófið í Hong Kong.

Endurskoðuð kennslubók komin út

Samhliða þessum tímamótum hefur Court of Master Sommeliers lokið við umfangsmikla endurskoðun á kennslubók sinni, sem hefur um árabil verið notuð víða um heim í menntun vínþjóna og kemur nú út í sjötta sinn í endurskoðaðri útgáfu.  Bókin kemur nú út undir heitinu Sommelier, en hét áður Sales and Service for the Wine Professional.

Að sögn Ronan er þetta fyrsta heildarendurskoðun bókarinnar í sjö ár. Efnið hefur verið uppfært með nýjum upplýsingum og kortum sem endurspegla þróun vínheimsins og nútímalega drykkjaþjónustu.

Hann segir bókina ekki aðeins ætlaða þeim sem stefna á starfsferil sem vínþjónar heldur einnig öllum sem vilja dýpka þekkingu sína á víni og drykkjamenningu. Hún hafi verið eitt helsta kennslurit verðandi vínþjóna frá fyrstu útgáfu árið 1988.

Myndir: mastersommeliers.org