Michelin-hjónin hætta skyndilega á À L’aise tveimur mánuðum eftir nýja Michelin-stjörnu

Ulrik Jepsen, yfirkokkur À L’aise, og Mia Kondrup, framkvæmdastjóri staðarins, hafa sagt skilið við reksturinn.
Mynd: Instagram / L’aise

Eigendur og rekstraraðilar norska Michelin-veitingastaðarins À L’aise í Osló hafa ákveðið að draga sig út úr rekstrinum þegar í stað, aðeins tveimur mánuðum eftir að veitingastaðurinn hlaut Michelin-stjörnu í nýjustu útgáfu Michelin Guide.

Það eru hjónin Ulrik Jepsen, yfirkokkur staðarins, og Mia Kondrup, framkvæmdastjóri, sem greina frá ákvörðuninni í færslu á Instagram.

„Við viljum tilkynna að við höfum ákveðið að stíga til hliðar frá À L’aise þegar í stað. Það hefur verið einstök forréttindi að reka þennan veitingastað og það hefði aldrei verið mögulegt án gestanna okkar, birgja og frábærs starfsfólks,“

skrifa þau.

 

View this post on Instagram

 

A post shared by Ulrik / (@ulrikalaise)

Ekki kemur fram hver ástæða ákvörðunarinnar er og hafa hjónin enn ekki tjáð sig frekar um málið.

Hlaut fyrstu Michelin-stjörnuna árið 2023

Jepsen og Kondrup opnuðu À L’aise árið 2017. Veitingastaðurinn hlaut sína fyrstu Michelin-stjörnu árið 2023 og hefur síðan byggt upp gott orðspor fyrir matargerð þar sem norsk hráefni eru unnin með klassískum frönskum matreiðsluaðferðum.

Staðurinn vakti einnig athygli árið 2022 þegar hann bauð 52 úkraínskum flóttamönnum til jólaveislu.

Fyrir aðeins þremur vikum lýsti Mia Kondrup því yfir á Instagram að þau hygðust halda áfram að gera það sem þau elska, að elda mat og taka á móti hverjum gesti eins og hann væri að heimsækja staðinn í fyrsta sinn. Tilefnið var að À L’aise hafði verið valinn á hinn virta lista 50 Best Discovery.

Erfiðir tímar fyrir Michelin-staði í Osló

Brottför hjónanna kemur á krefjandi tíma fyrir fínni veitingastaði í Osló. Á þessu ári hafa þrír Michelin-veitingastaðir í borginni hætt rekstri, þar á meðal Bar Amour og Hot Shop.

Þrátt fyrir það bættust þrír nýir norskir veitingastaðir í hóp Michelin-staða árið 2026, þar á meðal Credo í Osló. Borgin er því nú með átta starfandi veitingastaði sem skarta Michelin-stjörnu, en alls eru 22 Michelin-veitingastaðir í Noregi.