ÓX í Reykjavík fær græna Michelin-stjörnu

Þráinn Freyr Vigfússon yfirkokkur ÓX

Michelin hefur nú opinberað nýjustu útgáfu sína af The MICHELIN Guide Nordic Countries fyrir árið 2025, þar sem matargerð og veitingamenning Norðurlanda er heiðruð með nákvæmu og faglegu vali dómara. Heildarfjöldi valinna veitingastaða nemur 282, þar af sex með þrjár stjörnur, fimmtán með tvær og 75 með eina Michelin-stjörnu. Þá eru 44 staðir heiðraðir með Bib Gourmand fyrir framúrskarandi verðgildi, og 39 fá græna Michelin-stjörnuna fyrir framsækna og umhverfisvæna nálgun í matreiðslu.

Alls bætast 33 nýir staðir við úrvalið í ár – þar á meðal íslenski veitingastaðurinn ÓX í Reykjavík, sem nú hlýtur grænu stjörnuna til viðbótar við sína hefðbundnu Michelin-stjörnu..

Í umsögn Michelin kemur fram:

ÓX býður gestum sínum upp á afar persónulega og margrétta matarupplifun sem spannar um það bil fjóra klukkutíma. Sjálfbær hugsun og djúp virðing fyrir hráefni eru áberandi í öllu ferlinu – allt frá innréttingum til úrvinnslu hráefna. Eldhússkáparnir á bak við borðið eru til að mynda upprunalega úr eldhúsi ömmu yfirkokksins, og gefa staðnum sjarma og sál.

Öll hráefni, að súkkulaði og kavíar undanskildum, eru fengin frá smáframleiðendum hér á landi, og fylgt er meginreglum sjálfbærrar matargerðar, þar sem markmiðið er að virða og nýta allt hráefnið til fulls. Jurtasöfnun og hefðbundnar varðveisluaðferðir gegna einnig lykilhlutverki í matreiðslunni.

Ísland, sem er fámennasta landið á lista Michelin Guide, lætur þó ekki sitt eftir liggja í matarmenningu Evrópu. Í nýjustu útgáfu leiðarinnar bætast tveir íslenskir veitingastaðir við: ÓX með sinni grænu stjörnu og Hosiló í Reykjavík, sem bætist nú í hóp valinna veitingastaða samkvæmt Michelin.

Mynd: facebook / ÓX