Manuel Schembri vann brons fyrir Íslands hönd

Toke Fiedler Terkildsen frá Danmörku fagnar sigrinum í keppninni um Besta vínþjón Norðurlandanna 2026.

Toke Fiedler Terkildsen frá Danmörku bar sigur úr býtum í keppninni um Besta vínþjón Norðurlandanna 2026 sem fram fór í Reykjavík um helgina. Dmitry Frolov frá Finnlandi varð í öðru sæti og Manuel Schembri, fulltrúi Íslands, hafnaði í þriðja sæti.

Keppnin fór fram á Hilton Reykjavík Nordica og komu þar saman færustu vínþjónar Norðurlandanna til að etja kappi um hinn eftirsótta titil. Samhliða keppninni fór fram vínsýning þar sem gestum gafst kostur á að kynna sér fjölbreytt úrval vína og hitta fulltrúa vínheimsins.

Sjá einnig: Manuel Schembri og Oddný Ingólfsdóttir keppa fyrir Íslands hönd

Íslenskur vínþjónn á verðlaunapalli

Manuel Schembri tryggði Íslandi þriðja sætið í keppninni og komst þar með á verðlaunapall í sterkum hópi norrænna vínþjóna.

Manuel Schembri

Sigurvegarinn, Toke Fiedler Terkildsen frá Danmörku, hlaut titilinn Besti vínþjónn Norðurlandanna 2026. Í verðlaun fær hann meðal annars fræðsluferð þar sem hann heimsækir víngerðir Champagne Lanson og Gérard Bertrand, sem voru aðalstyrktaraðilar keppninnar.

Dmitry Frolov frá Finnlandi varð í öðru sæti.

Verðlaunagripir og vinningar keppninnar um Besta vínþjón Norðurlandanna 2026.

Þakkir til þátttakenda og samstarfsaðila

Alba Hough, forseti Vínþjónasamtaka Íslands, þakkaði fyrir hönd samtakanna öllum þeim sem komu að keppninni og lögðu sitt af mörkum til að gera viðburðinn eftirminnilegan.

Alba Hough, forseti Vínþjónasamtaka Íslands, lengst til vinstri, ávarpar gesti ásamt dómurum keppninnar og forsetum vínþjónasamtaka Norðurlandanna.

Hún þakkaði sérstaklega keppendum fyrir metnað þeirra og dómurum fyrir að miðla þekkingu sinni og reynslu. Þá færði hún samstarfsaðilum og þeim fyrirtækjum sem tóku þátt í vínsýningunni sérstakar þakkir, auk aðalstyrktaraðilanna Champagne Lanson og Gérard Bertrand.

Vínþjónasamtök Íslands sögðust jafnframt vona að norrænu gestirnir hefðu notið íslenskrar gestrisni jafn mikið og heimamenn nutu þess að taka á móti þeim.

Samtökin óskuðu verðlaunahöfunum innilega til hamingju og sögðu keppendur enn á ný hafa lyft grettistaki fyrir norræna vínþjónamenningu.

Að lokum var norræna vínþjónafjölskyldan kvödd með þeim orðum að samtökin hlökkuðu þegar til næstu endurfunda.

Myndir: Vínþjónasamtök Íslands