Yfir 166 þúsund krónur á mann fyrir veitingar á heimaleik Fulham

Enska úrvalsdeildarfélagið Fulham hefur kynnt til sögunnar nýja veitingaupplifun á heimaleikjum á Craven Cottage, þar sem boðið verður upp á matargerð sem hlotið hefur meðmæli Michelin-handbókarinnar.

Upplifunin ber heitið „Constance on Matchdays“ og er unnin í samstarfi við veitingastaðinn Constance við Fulham Pier. Michelin-stjörnukokkurinn Adam Byatt stýrir verkefninu en yfirkokkurinn Charlie Crote hefur umsjón með matreiðslunni.

Á matseðlinum verður lögð áhersla á vandaða og árstíðabundna rétti. Gestir fá einnig úrvalsvín, kampavín og kokteila en vínlistinn telur um 200 vín.

Í pakkanum eru auk þess sæti við miðlínu vallarins, úrvalsdrykkir og tækifæri til að hitta leikmenn Fulham.

Fulham verður fyrsta knattspyrnufélagið í Bretlandi sem býður upp á veitingaupplifun á heimaleikjum sem hlotið hefur meðmæli Michelin-handbókarinnar. Veitingastaðurinn er þó ekki með Michelin-stjörnu heldur er hann á lista handbókarinnar yfir staði sem hún mælir með.

Verðið er mismunandi eftir leikjum en getur farið yfir 1.000 pund á mann, sem samsvarar rúmlega 166 þúsund íslenskum krónum. Fyrst verður boðið upp á upplifunina þegar Fulham tekur á móti Chelsea á Craven Cottage mánudaginn 24. ágúst næstkomandi.

Mynd: fulhamfc.com