Nuno og Bento kaupa Fálkahúsið – eiga nú húsið að baki Sæta Svínsins, Fjallkonunnar og Tipsy

Fálkahúsið við Hafnarstræti 1-3.

Portúgölsku veitingamennirnir Nuno Faria og Bento Amaral hafa fest kaup á Fálkahúsinu við Hafnarstræti 1-3, en fasteignin hýsir þrjá veitingastaði í þeirra eigu: Sæta Svínið, Fjallkonuna og kokteilbarinn Tipsy. Með kaupunum styrkja þeir enn frekar stöðu sína í miðborginni, þar sem þeir reka einnig veitingastaðina Apótekið á horni Austurstrætis og Pósthússtrætis, Sushi Social við Þingholtsstræti og Tres Locos á Hafnarstræti og Tapasbarinn.

Samkvæmt heimildum vefsins eirikurjonsson.is var kaupverð á fermetra rúmlega 700 þúsund krónur, sem telst fremur hóflegt miðað við staðsetningu eignarinnar í hjarta borgarinnar – þar sem eftirspurn eftir atvinnuhúsnæði er mikil og verð yfirleitt hátt.

Fálkahúsið er hluti af sögulegu borgarlandslagi og hefur á undanförnum árum þróast í einn vinsælasta veitingakjarna Reykjavíkur. Kaupin eru enn eitt skrefið í vaxandi áhrifum Nuno og Bento á íslenska veitingamarkaðnum, en þeir hafa á undanförnum árum skapað sér traustan sess með áherslu á gæði, alþjóðlegt andrúmsloft og öfluga þjónustu.

Mynd: midborgin.is