Myndir og vídeó frá Tipsý viðburðinum á Múlabergi – Ingibjörg Bergmann: Það er alveg greinilegt að kokteilamenningin á Akureyri blómstar ….

Kokteilameistarar Tipsý voru með PopUp á Múlabergi nú á dögunum þar sem þeir buðu upp á vinsælustu kokteila Tipsý-barsins.

„Skemmtileg helgi og frábært samstarf með þessum kokteilasnillingum“

Sagði Ingibjörg Bergmann Bragadóttir eigandi Múlaberg í samtali við veitingageirinn.is.

Seldist allt upp

„Alls vorum við með 370 gesti í mat hjá okkur og margir sem komu bara í drykki bæði föstudags -og laugardagskvöld svo ég myndi skjóta á að um 500 manns hafi verið hjá okkur í mat og drykk um helgina.

Gerðum svo marga kokteila um helgina, að það seldist allt upp hjá okkur í lokin á laugardagskvöldinu.“

Sagði Ingibjörg Bergmann.

„Þau Sævar, Andrea og Kría sem komu frá Tipsý voru æðisleg og algjörir fagmenn – það var alveg hægt að gleyma sér í því að fylgjast með þeim og Ými Valssyni, yfirbarþjóninum okkar, töfra fram hvern drykkinn á fætur öðrum um helgina á mettíma.“

Kokteilamenningin á Akureyri blómstar

Hvernig fannst þér upplifun gesta með viðburðinn?

„Gestirnir okkar voru að taka ótrúlega vel í þetta og margir sem komu bara til að fá sér kokteila. Það er alveg greinilegt að kokteilamenningin á Akureyri blómstar.

Þetta var alveg ótrúlega vel heppnað og umfram allt ótrúlega skemmtilegt pop-up! Virkilega gaman að sjá hvað Akureyringar tóku vel í þessa helgi og nýttu sér pop-up ekki bara hjá okkur, heldur líka á LYST og Rub23.

Þetta var svo glæsileg helgi á Akureyri og alltaf svo gaman þegar svona margir fagmenn í bransanum koma saman og skapa svona magnaða upplifun. Þetta gerum við alveg klárlega aftur og oftar vonandi.“

Sagði Ingibjörg að lokum.

Myndir: aðsendar