BBQ-hátíð verður haldin í fyrsta sinn á Íslandi núna um helgina

RVK BBQ Festival 2026 verður haldin í Kolaportinu dagana 30. og 31. maí og er um að ræða fyrstu íslensku matarhátíðina sem er alfarið helguð BBQ- og reykmatargerð. Að hátíðinni stendur Götubitinn undir stjórn Roberts Magnússonar.

Hátíðin verður haldin í hinu sögufræga húsnæði Kolaportsins í miðborg Reykjavíkur og ber yfirskriftina „Reykur. Eldur. Stemning.“ Samkvæmt skipuleggjendum er innblásturinn meðal annars sóttur til erlendra BBQ-hátíða á borð við Meatopia í London.

Markmiðið með RVK BBQ Festival er að leiða saman grillara, framleiðendur og mataráhugafólk í kringum reykmat, grillmenningu og lifandi matarupplifun. Þar munu bæði þekkt nöfn úr bransanum og áhugagrillarar sýna listir sínar fyrir gestum.

Hátíðin verður opin laugardaginn 30. maí frá klukkan 12 til 21 og sunnudaginn 31. maí frá klukkan 12 til 18. Aðgangur verður ókeypis fyrir gesti.

Nánari upplýsingar og dagskrá má finna á bbqfestival.is.