Latínó-stemning tekur yfir Kolaportið um helgina

Um næstu helgi sameinar nýi matar- og menningarviðburðurinn Sabor Latino það besta úr mat, tónlist og menningu Mið- og Suður-Ameríku í Kolaportinu, Tryggvagötu 19.

Fremstu götubitavagnar landsins saman komnir

Þrír af fremstu matarvögnum landsins munu leiða saman hesta sína:

Mijita, sem býður upp á kólumbískan mat, ásamt The Food Truck og La Buena Vida, sem bæði koma frá Mexíkó.

Maria Jimenez Pacifico rekur hinn vinsæla matarvagn Mijita.

Allir þrír vagnarnir hafa verið í fremstu röð á Götubitahátíðinni undanfarin ár. The Food Truck bar sigur úr býtum á hátíðinni í fyrra, La Buena Vida hafnaði í þriðja sæti og Mijita hlaut hin virðulegu „Best in Show“ verðlaun árið 2025.

The Food Truck sigraði Götubitahátíðina í fyrra.

Auk glæsilegs matarúrvals verður boðið upp á iðandi stemningu, salsadans, lifandi tónlist og fjölbreytta afþreyingu fyrir alla fjölskylduna. Þar á meðal verður hefðbundin piñata og andlitsmálning fyrir yngstu kynslóðina.

La Buena Vida verður meðal matarvagna á Sabor Latino í Kolaportinu.

Aðgangur er ókeypis og allir velkomnir til að njóta og upplifa sanna latínó-stemningu í hjarta Reykjavíkur.

Myndir: aðsendar / Kolaportið