Heimsklassa gestakokkar á MATEY í maí

MATEY sjávarréttahátíðin snýr aftur til Vestmannaeyja dagana 22. og 23. maí næstkomandi og fer hún nú fram í fjórða sinn. Hátíðin hefur á skömmum tíma fest sig í sessi sem einn áhugaverðasti viðburður landsins fyrir fagfólk og áhugafólk um sjávarfang.

Í ár verður sérstaklega vel vandað til verka þegar þrír þekktir gestakokkar taka yfir eldhús vinsælla staða í Eyjum. GOTT fær til liðs við sig Hákon Má Örvarsson, veitingastaðurinn Einsi kaldi verður undir stjórn Gústavs Axels Gunnlaugssonar og NÆS fær til sín Vilhjálm Sigurðarson. Þar mun ferskt íslenskt sjávarfang leika aðalhlutverkið og hver kokkur setja sitt mark á matseðilinn.

Fleiri staðir taka þátt í hátíðinni með sínum hætti. Tanginn og Kráin bjóða upp á sérrétti í tilefni hennar og Brothers Brewery kynnir sérlagaðan MATEY-bjór sem bruggaður er sérstaklega fyrir helgina.

Fyrir þá sem hafa áhuga á sjávarréttum í fremstu röð er þetta helgi sem vert er að setja á dagatalið.

Tryggðu þér borð í tæka tíð hér.

Veitingageirinn.is hefur í gegnum árin fjallað vel um hátíðina og engin undantekning verður í ár.