Handverksbjór og matarveisla á Hólum

Bjórhátíðin á Hólum í Hjaltadal 2023
Mynd: facebook / Bjórsetur Íslands

Bjórhátíðin á Hólum verður haldin laugardaginn 6. júní næstkomandi frá klukkan 15 til 19 og stefnir allt í sannkallaða veislu fyrir áhugafólk um handverksbjór og mat.

Hátíðin hefur oft verið kölluð árshátíð handverksbruggaranna á Íslandi og þar gefst gestum kostur á að smakka úrvalsbjóra frá flestum brugghúsum landsins. Samhliða bjórnum verður einnig boðið upp á fjölbreytt matarúrval og hefur hátíðin á undanförnum árum þróast í að vera ekki síður matarveisla en bjórhátíð.

Fram kemur í kynningu hátíðarinnar að ekki þurfi að kaupa miða til að mæta á svæðið ef fólk ætlar eingöngu að gæða sér á matarbita sem verða í boði yfir daginn.

Miðasala er hafin á Tix.is og er aldurstakmark á hátíðina 20 ár.

Skipuleggjendur segja gesti velkomna heim að Hólum þar sem saman fari góður matur, íslenskt handverk og stemning í fallegu umhverfi.