Brixton tekinn til gjaldþrotaskipta

Mynd: aðsend

Hamborgarastaðurinn Brixton í Reykjavík hefur verið tekinn til gjaldþrotaskipta samkvæmt upplýsingum sem birtar hafa verið í Lögbirtingablaðinu.

Brixton vakti talsverða athygli við opnun sína í desember 2024, að því er fram kemur í umfjöllun mbl.is. Mikil umræða skapaðist um staðinn og fjölmargir áhrifavaldar kynntu hann á samfélagsmiðlum.

Meðal þeirra sem komu að rekstrinum við opnun voru Sigurður Gunnlaugsson, oft kallaður Siggi Chef, Róbert Aron Magnússon, eigandi Götubitahátíðarinnar, Helgi Svavar Helgason tónlistarmaður og Guðmundur Gunnarsson sem áður sá meðal annars um Hamborgarabúllu Tómasar í Berlín.

Samkvæmt upplýsingum sem fram koma í frétt mbl.is fóru Helgi Svavar og Guðmundur út úr rekstrinum fyrir um tíu mánuðum. Þá seldi Róbert Aron sinn hlut í fyrirtækinu í mars á þessu ári. Nýir eigendur voru Jón Örn Jakobsson og Helgi Magnús Hermannsson.

Á heimasíðu Brixton kemur fram að staðurinn sé lokaður vegna breytinga. Nú liggur hins vegar fyrir að félagið hefur verið tekið til gjaldþrotaskipta samkvæmt upplýsingum úr Lögbirtingablaðinu.

Hægt er að lesa nánar um málið í umfjöllun mbl.is.