Pítsuofninn kominn á GOTT eftir lokun Pítsugerðarinnar

GOTT í Vestmannaeyjum hefur opnað aftur eftir umfangsmiklar breytingar á staðnum og uppfærðan matseðil.

Í samtali við veitingageirinn.is segir Berglind Sigmarsdóttir að breytingarnar hafi meðal annars falið í sér lokun Pítsugerðarinnar og flutning á ofni yfir á GOTT.

„Við lokuðum Pítsugerðinni og færðum ofninn yfir á GOTT. Svo nú er hægt að fá eldbakaðar pítsur einnig á GOTT. Við að koma ofninum fyrir þurfti að gera töluverðar breytingar á salnum,“

segir Berglind.

Sigurður Gíslason og Berglind Sigmarsdóttir

Um er að ræða ítalskan steinofn sem vegur rúmlega tvö tonn og kallaði uppsetning hans á verulegar framkvæmdir inni í sal veitingastaðarins. Eigendur staðarins, yfirkokkurinn Sigurður Gíslason og Berglind, hafa því haft í nógu að snúast undanfarnar vikur við að aðlaga rýmið að nýjum áherslum.

Með breytingunum hefur matseðillinn einnig tekið nokkrum stakkaskiptum. Nýir réttir hafa bæst við í bland við þá klassísku, en áfram er lögð rík áhersla á handverk og ferskleika. Á GOTT er pasta gert frá grunni, ís framleiddur á staðnum og allar sósur, súpur og kökur eru gerðar frá grunni í eldhúsinu.

Þá sækja kokkar staðarins ferskan fisk beint af fiskmarkaði á hverjum morgni, sem endar í vönduðu hráefnisvali. Með þessum breytingum leitast GOTT við að bæta upplifun gesta.

Myndir: úr einkasafni