Ný uppskera af íslensku spergilkáli komin í verslanir

Nýskorið íslenskt spergilkál er nú komið í verslanir um land allt.

Ný uppskera af íslensku spergilkáli er nú komin í verslanir um land allt. Það kemur fram í tilkynningu frá Sölufélagi garðyrkjumanna.

Þar er bent á að fátt jafnist á við nýskorið spergilkál sem fer beint af akrinum í verslanir og á matarborðið. Ný uppskera einkennist af ferskleika og góðum gæðum og markar upphaf tímabils íslensks spergilkáls.

Ríkt af næringarefnum

Spergilkál er gjarnan talið meðal næringarríkustu grænmetistegunda og er sérstaklega trefjaríkt. Auk þess er það ríkt af C-vítamíni og kalíum og inniheldur einnig mikið magn fólínsýru.

Í tilkynningunni er jafnframt minnt á að ekki aðeins blómið nýtist vel heldur einnig stilkurinn og blöðin. Við eldun verða þau mjúk og henta vel í fjölbreytta matargerð, hvort sem spergilkálið er soðið, gufusoðið, steikt eða bakað.

Fólínsýra mikilvæg á meðgöngu

Sölufélag garðyrkjumanna vekur einnig athygli á því að fólínsýra gegnir mikilvægu hlutverki, ekki síst fyrir konur á meðgöngu og þroska fósturs.

Með komu nýrrar uppskeru gefst neytendum því kostur á að njóta fersks íslensks spergilkáls sem er bæði bragðgott og næringarríkt.

Mynd: Facebook / islenskt.is