Nýjar íslenskar kartöflur vekja alltaf eftirvæntingu

Nýjar kartöflur með smjöri og salti eru fyrir marga ómissandi hluti af íslenska sumrinu.

Ný uppskera af íslenskum kartöflum er nú farin að berast í verslanir um land allt. Það kemur fram í tilkynningu frá Sölufélagi garðyrkjumanna.

Kartöflubændur víða um land eru þessa dagana í óða önn við uppskeru og eykst framboð á nýjum íslenskum kartöflum jafnt og þétt með hverjum deginum sem líður.

Ekkert jafnast á við nýjar kartöflur

Fyrstu kartöflur tímabilsins vekja jafnan mikla eftirvæntingu enda eru þær fastur liður í íslensku sumri og jafnast fátt á við glænýjar soðnar kartöflur bornar fram með smjöri og salti.

Nýuppteknar kartöflur eru þekktar fyrir milt bragð, mjúka áferð og ferskleika sem einkennir uppskeru beint úr íslenskum görðum.

Framboðið eykst dag frá degi

Þegar líður á uppskerutímann mun framboð á íslenskum kartöflum aukast enn frekar og verða þær sífellt aðgengilegri í verslunum um land allt.

Sölufélag garðyrkjumanna hvetur neytendur til að njóta nýju uppskerunnar á meðan hún stendur sem hæst og segir að fátt komist nær íslensku sumri en nýsoðnar kartöflur með smjöri og salti.

Nánar á islenskt.is.