Kjötsúpugerð í beinni útsendingu á samfélagsmiðlum – 24. október 2020

Allir Íslendingar elska kjötsúpu, enda eiga allar íslenskar fjölskyldur sína uppáhalds uppskrift af kjötsúpunni sinni. Uppskrift sem er alltaf sú eina rétta því að súpan hennar mömmu eða ömmu er alltaf best. Hún vekur góðar minningar, kallar fram bros og yljar hjartanu jafnt sem hún er bragðgóð, seðjandi og næringarrík.

Síðastliðin ár hefur íslensku kjötsúpunni verið gert hátt undir höfði með sérstökum Kjötsúpudegi sem haldinn hefur verið hátíðlegur fyrsta vetrardag á Skólavörðustíg. Þar hafa veitingamenn boðið gestum og gangandi upp á kjötsúpur í hinum ýmsu útgáfum. Samkomubann hefur þó sett strik í reikningin í ár en Landssamtök Sauðfjárbænda og Sölufélag Garðyrkjumanna hafa nú tekið höndum saman og með dyggri aðstoð frumkvöðlana á Skólavörðustíg verður Kjötsúpudagurinn haldinn með breyttu sniði í ár.

Gísli Matthías Auðunsson

Á facebook síðu Lambakjöts voru kynntar fjórar ólíkar uppskriftir af kjötsúpu, en Gísli Matthías Auðunsson matreiðslumeistari tók saman uppskriftirnar. Þjóðin kaus sína uppáhaldssúpu á facebook síðunni lambakjöt en kosningin stóð til og með 21. október. Kom það ekki mörgum á óvart að gamla góða ömmusúpan varð fyrir valinu. Gísli mun kenna áhorfendum að elda súpuna í beinni útsendingu á facebook síðunni Lambakjöt á fyrsta vetrardag, þann 24. október klukkan 13:00. Hann ætlar að fara yfir hvað þarf að hafa í huga við val á kjöti, hvaða grænmeti er nú í árstíð og fara yfir sögu kjötsúpunar.

Vona aðstandendur kjötsúpudagsins að sem flestir fylgist með Gísla á laugardag og eldi síðan sína eigin súpu á um kvöldið til þess að  halda kjötsúpudaginn hátíðlegann heima.“ Hægt verður að fylgjast með útsendingunni á facebook síðununum Lambakjöt, Íslenskt.is, Veitingageirinn.is og á facebook síðu Bændablaðsins.

Myndir: aðsendar