Ísak Aron kynnir íslenskan mat á þriggja daga menningarhátíð í Seattle

Ísak Aron Jóhannsson
Mynd: Mummi Lú

Taste of Iceland hátíðin snýr aftur til Seattle í dag, 19. mars, og stendur yfir næstu þrjá daga, þar sem íslensk menning, matargerð og listir fá að njóta sín í þremur viðburðaríkum dögum víðs vegar um borgina. Boðið verður upp á fjölbreytta dagskrá, allt frá tónlist og listviðburðum til matargerðar sem dregur fram sérstöðu íslensks hráefnis og hugmyndaauðgi.

Einn af hápunktum hátíðarinnar er sérstakur pop-up kvöldverður þar sem matreiðslumaðurinn Ísak Aron Jóhannsson sameinar krafta sína með bandaríska kokkinum Ron Anderson.

Andreas Jacobsen
Mynd: úr einkasafni

Með Ísaki til halds og trausts er matreiðslumeistarinn Andreas Jacobsen.

Kvöldverðurinn fer fram á Palace Kitchen og verður í boði öll kvöld frá klukkan 17 til miðnættis.

Matseðillinn er þriggja rétta og byggir á íslenskum hráefnum og innblæstri úr náttúru landsins. Meðal annars verður boðið upp á þorsk frá Íslandi og lambakjöt sem hefur lengi verið eitt af helstu gæðamerkjum íslenskrar matarmenningar.

Léttreyktur þorskur

Í forrétti er léttreyktur þorskur borinn fram með sellerírót, bæði súrsaðri og maukaðri, ásamt grilluðu grænkáli. Réttinum fylgir létt froðukennd sósa úr kryddjurtum og hvítvíni.

Grillað lambafille

Aðalrétturinn samanstendur af mysugljáðu og grilluðu lambafille með perlubyggi, ofnbökuðum gulrótum og villisvepparagúi. Með því er borið fram gnocchi í Feyki, auk kraftmikillar sósu úr lambasoði.

Skyr- og sítrónufrauð

Eftirrétturinn er í léttari kantinum en þó með skýra íslenska skírskotun. Þar er skyr- og sítrónufrauð með hindberjakompotti og þurrkuðu lakkrísmarengsi, auk hindberja- og hvítsúkkulaðiköku með.

Verð fyrir þriggja rétta máltíð er 85 bandaríkjadalir á mann.

Flestir viðburðir hátíðarinnar eru gestum að kostnaðarlausu og markmiðið er að kynna íslenska menningu á lifandi og aðgengilegan hátt fyrir heimafólki í Seattle.