Diageo losar um eignir – Kína ekki lengur forgangsmarkaður

Höfuðstöðvar Diageo í London.
Guinness er eitt stærsta og þekktasta vörumerki Diageo, sem varð til við samruna Guinness PLC og Grand Metropolitan árið 1997.
Mynd: Mkorukmez, Wikimedia Commons, CC BY-SA

Diageo mun samkvæmt heimildum kanna mögulega sölu á ráðandi hlut sínum í kínverska baijiu-framleiðandanum Sichuan Swellfun, sem meðal annars stendur að Shuijingfang-vörumerkinu. Um er að ræða hluta af stefnu félagsins um að losa um eignir og draga úr skuldsetningu í kjölfar stjórnendaskipta.

Diageo á rúmlega 63 prósenta hlut í Sichuan Swellfun, sem er skráð á markað í Shanghai. Samkvæmt Bloomberg.com hafa bankar þegar verið að kanna áhuga hugsanlegra kaupenda. Markaðsvirði félagsins er metið á um 2 milljarða punda, sem jafngildir um 350 milljörðum íslenskra króna. Hlutur Diageo gæti því verið um 1,25 milljarðar punda, eða ríflega 220 milljarðar króna. Hlutabréf félagsins hafa lækkað um 14 prósent á síðustu tólf mánuðum og Diageo hefur greint frá verulegum samdrætti í sölu í Kína.

Undanfarið ár hefur Diageo lagt aukna áherslu á eignasölur til að styrkja efnahagsreikning sinn. Þar má nefna áform um sölu á meirihluta í East African Breweries og mögulega sölu á krikketliðinu Royal Challengers Bangalore. Ef allar þessar ráðstafanir ganga eftir gæti félagið aflað sér allt að 6 milljarða Bandaríkjadala, sem samsvarar um 830 milljörðum íslenskra króna.

Endanlegar ákvarðanir liggja hjá nýjum forstjóra félagsins, Dave Lewis, sem tók við starfinu um áramót. Fjárfestar bíða nú eftir því að hann kynni stefnu sína fyrir Diageo síðar í febrúar.