Alþjóðlegt ævintýri hefst hjá Barþjónaklúbbi Íslands

Barþjónaklúbbur Íslands sendir í fyrsta sinn keppanda á 35. Asia-Pacific kokteilkeppnina, sem fram fer í Singapore dagana 24.–27. ágúst. Sjálf keppnin fer fram 25. ágúst á Clarke Quay Fountain Square, þar sem keppendur víðs vegar að koma saman og etja kappi í kokteilgerð.

Fyrir hönd Íslands fara Elvar Halldór Hróarr Sigurðsson, keppandi, og Helgi Aron Ágústsson, stjórnarmaður Barþjónaklúbbs Íslands og þjálfari. Þetta er í fyrsta sinn sem Barþjónaklúbbi Íslands er boðið að taka þátt í keppninni og markar því spennandi skref í alþjóðlegu starfi klúbbsins.

Elvar hafnaði í 4. sæti á Íslandsmóti barþjóna (ICC) fyrr á árinu og fær nú tækifæri til að stíga á alþjóðlegt svið í Singapore.

Þátttakan er hluti af þeirri stefnu Barþjónaklúbbs Íslands að skapa fleiri tækifæri í kringum Íslandsmeistaramót barþjóna og dreifa alþjóðlegri keppnisreynslu á breiðari hóp af fremstu keppendum landsins. Markmiðið er að alþjóðleg tækifæri einskorðist ekki eingöngu við Íslandsmeistarann heldur geti fleiri þeirra sem sýna framúrskarandi árangur á mótinu fengið tækifæri til að sanna sig utan landsteinanna.

Pétur Hafsteinn Kolka Úlfsson, sem hafnaði í 2. sæti á ICC, fær þannig einnig sitt alþjóðlega tækifæri í ár. Hann mun taka þátt í Lotus Prestige Cup í Macau, sem fer fram samhliða Heimsmeistaramóti barþjóna í lok október.

Þar verður einnig Leó Snæfeld, Íslandsmeistari barþjóna, sem mun bera fána Íslands á stærsta og mikilvægasta móti ársins, World Cocktail Championship (WCC).

Með þessari stefnu vill Barþjónaklúbbur Íslands verðlauna góðan árangur á Íslandsmótinu, byggja upp breiðari hóp reynslumikilla keppenda og gefa fleiri íslenskum barþjónum tækifæri til að öðlast dýrmæta reynslu á alþjóðlegum vettvangi.

Í Singapore bíður Elvars alvöru áskorun, en jafnframt einstakt tækifæri til að kynna íslenska kokteilmenningu og keppa við öfluga barþjóna á alþjóðlegum vettvangi.

Það eru bjartir tímar framundan hjá íslenskum barþjónum.

Barþjónaklúbbur Íslands óskar Elvari og Helga góðrar ferðar og góðs gengis í Singapore.

Fylgist með ævintýrum þeirra og gangi mála á Instagram: @bartendericeland

Myndir: Barþjónaklúbbur Íslands