Reynsluboltar úr veitingageiranum opna kokteilbar á Hverfisgötu

Resident Room, nýr og fágaður kokteilbar, opnar dyr sínar að Hverfisgötu 26, þar sem Mat bar var áður til húsa, næstkomandi miðvikudag.

Að staðnum stendur hópur reynslubolta úr veitinga- og skemmtanageiranum sem ætlar sér að hrista rækilega upp í íslensku kokteilsenunni.

Resident Room er sérstaklega hannaður með markhópinn 30 ára og eldri í huga. Megináhersla staðarins er lögð á framúrskarandi kokteila, vandlega valið vínúrval og glæsilegan „happy hour“. Einnig verður boðið upp á létta rétti eða ,,aperitivo” sem tónar fullkomlega við drykkjaseðilinn.

Opnunartími verður frá klukkan 16:00 til 01:00, sem gerir staðinn tilvalinn jafnt fyrir eftirvinnudrykkinn sem og notalegt kvöld í góðra vina hópi.

Slippbarsteymið mætt aftur til leiks

Danni Baróns og Ásgeir Már Björnsson á Food & Fun-hátíðinni í Turku í Finnlandi árið 2015.

Það sem mun án efa vekja mikla athygli er teymið sem stýrir barnum. Þar fara fremstir í flokki þeir Ásgeir Már Björnsson, betur þekktur sem Ási, og Rás 2 útvarpsmaðurinn Danni Baróns. Ási er af mörgum talinn einn helsti brautryðjandi kokteilmenningarinnar eins og við þekkjum hana á Íslandi í dag.

Ási og Danni á Food & Fun-hátíðinni í Turku í Finnlandi árið 2015.

Eftir að hafa verið búsettur erlendis undanfarin misseri er hann nú snúinn aftur heim og hefur tekið höndum saman við Danna, en þeir félagar störfuðu einmitt lengi saman á Slippbarnum þar sem íslenska kokteilbyltingin hófst fyrir alvöru. Markmið þeirra á Resident Room er skýrt: Að halda áfram að ýta mörkum kokteilsenunnar enn lengra.

Auk þeirra Danna og Ása kemur að staðnum fólk með áratugareynslu úr íslenska skemmtanalífinu, meðal annars frá goðsagnakenndum stöðum á borð við Rex og Loftið. Sú reynsla mun skila sér í framúrskarandi þjónustu og andrúmslofti þar sem fagmennskan er í fyrirrúmi.

Myndir: aðsendar