Skál! fær Saji í heimsókn indónesískt pop-up í tvö kvöld

Veitingastaðurinn Skál! býður upp á einstaka matarupplifun í lok október þegar hinn indónesíski veitingastaður Saji úr Kaupmannahöfn tekur yfir eldhúsið í tvö kvöld. Viðburðurinn fer fram 27. og 28. október á Njálsgötu 1 og er þetta þriðja pop-up kvöld Skál! á árinu.

Saji var stofnaður árið 2022 af vinunum og kokkunum Sam og Jimmy sem eiga það sameiginlegt að deila bragðheimi æsku sinnar í Indónesíu. Nafnið „Saji“ merkir „að þjóna“ og endurspeglar þeirra ástríðu fyrir því að miðla hlýlegum og persónulegum réttum, ríkum af kryddum og sál. Á stuttum tíma hefur Saji vakið mikla athygli í Kaupmannahöfn og nú færa þeir kraftinn norður í kuldann með kryddaðan yl frá Suðaustur-Asíu.

Gestir geta átt von á kvöldi þar sem kryddaðir og huggulegir réttir fara saman við náttúruvín og skemmtilega orku. Matseðill kvöldsins er á 14.950 krónur á mann og er hægt að bæta við vínpörun fyrir 9.990 krónur. Þar sem sætaframboð er takmarkað er mælt með að tryggja sér borð tímanlega í gegnum Dineout.

Bókanir fara fram hér: Dineout – Skál! × Saji Pop-up