Þjófar rændu vínviði af nærri einum hektara – um 8.000 fermetrar af þrúgum hurfu í Þýskalandi

Ótrúlegur atburður átti sér stað í vínræktarhéruðunum við Gundheim í Rheinland-Pfalz þar sem tveir sjálfstæðir vínræktendur urðu fyrir stórfelldu tjóni. Þegar þeir mættu til uppskeru um síðustu helgi blasti við þeim auður akur og var ekkert annað eftir en berar greinar vínviðarins.

Um er að ræða um 8.000 fermetra landsvæði sem var svipt þrúgum af þekktum tegundum á borð við Riesling og Sauvignon Blanc. Lögreglan telur að þjófnaðurinn hafi átt sér stað á tímabilinu 6. til 14. september, en erfitt er að ákvarða nákvæman tíma þar sem enginn hafði heimsótt akrana í nokkrar vikur.

Á fréttavef Reuters kemur fram að öll merki benda til skipulagðs verknaðar.  Jarðvegurinn og grasið í kring bera vott um umferð stórra ökutækja og greinilegt er að notast hafi verið við sérhæfð uppskerutæki til að ná þrúgunum af grein. Líklegt þykir að þjófarnir hafi haft bæði vélbúnað og flutningsbíla til ráðstöfunar.

Tjónið nemur mörgum þúsundum evra og er ljóst að ræktendurnir horfa á heila uppskeru hverfa úr höndum sér með ótrúlegum hætti.