Opna baðstað við Hoffellssjökul og fjölbreytta gistingu

Frá vinstri: Sigfinnur Mar Þrúðmarsson, Grímur Sæmundsen, Þrúðmar S. Þrúðmarsson, Sigursteinn Árni Brynjólfsson, Marín Ósk Björgvinsdóttir, Hólmfríður Bryndís Þrúðmarsdóttir og Aldís Aþena Björgvinsdóttir

Bláa Lónið hf. hefur fest kaup á jörðinni Hoffell 2 í Austur-Skaftafellssýslu en kaupin eru liður í áformum félagsins um uppbyggingu fleiri áhugaverðra áfangastaða á Íslandi. Markmiðið er að móta einstakan stað fyrir ferðamenn, við rætur Hoffellsjökuls og skapa segul sem styrkir Suðausturland sem áfangastað ferðamanna, að því er fram kemur í fréttatilkynningu.

Bláa Lónið hf. er móðurfélag Blue Lagoon Iceland, Blue Lagoon Skincare, The Retreat, veitingastaðarins Moss og Highland Base – Kerlingarfjöll auk annarrar veitingaþjónustu í og við þessar rekstrareiningar. Félagið vinnur að uppbyggingu ferðaþjónustu í Þjórsárdal og á auk þess hlut í ýmsum verkefnum tengdum ferðamennsku víða um land.

Seljendur jarðarinnar eru hjónin Þrúðmar Þrúðmarsson og Ingibjörg Steinsdóttir sem hafa rekið gistiþjónustu og heitar laugar að Hoffelli síðastliðinn áratug. Þau segjast ánægð með frekari uppbyggingu á svæðinu og telja að bætt aðgengi að þessari náttúruperlu geti aukið aðdráttarafl og samkeppnishæfni Austurlands til framtíðar.

„Ferðamennskan  hefur byggst upp hægt og rólega hjá okkur í gegnum árin. Margt ferðafólk fer í dagsferðir að Jökulsárlóni frá Reykjavík en fer síðan ekki lengra. Með því að fá vandaða uppbyggingu hér við Hoffell, þá vonandi fjölgar þeim sem gista yfir nótt og fara lengra austur, því hér er ótrúlega margt að sjá og upplifa,“

segir Ingibjörg Steinsdóttir, fráfarandi ferðaþjónustubóndi á Hoffelli 2.

Uppbyggingin verður skammt frá Hoffellsjökli, sem er skriðjökull úr Vatnajökli, með útsýni yfir jökullónið sem þar er. Gestastofa Hoffells verður ný upplýsingamiðstöð með jöklasýningu en þau hjónin, Þrúðmar og Ingibjörg, hafa safnað einstökum heimildum um Hoffellsjökul, þróun og jarðfræði svæðisins.

Samhliða þessu hefur Bláa lónið hf. gert samning við RARIK um aðgang að heitu vatni til uppbyggingar á nýjum baðstað við Hoffellsjökul.

Uppbygging innviða er þegar hafin

Baðlónið við Hoffellsjökul verður einstakt á heimsvísu að því leyti að allt vatn sem notað er, verður endurnýtt. Heitt vatn fannst fyrst í Hoffelli um síðustu aldamót en sú uppgötvun gerði RARIK kleift að leggja hitaveitu í nærliggjandi byggðalög.

Þeirri framkvæmd lauk árið 2021 og var hún mikið framfaraskref fyrir innviði á svæðinu þar sem hún sér íbúum fyrir hita og rafmagni og leysti fjarvarmaveitu af hólmi. Jarðvarmaorkan frá hitaveitunni er forsenda fyrir uppbyggingu baðlónsins við Hoffell.

„Það er afskaplega jákvætt fyrir hitaveituna að fá jafn öflugan viðskiptavin og Bláa Lónið hf. Samningurinn er því mikilvægur bæði fyrir RARIK og samfélagið í Hornafirði en nýframkvæmdir eins og hitaveitan í Hoffelli eru þungar í rekstri fyrstu árin. Samningurinn eykur fastar tekjur veitunnar og léttir því uppbygginguna.

Afhending á heitu vatni til baðlónsins mun hvorki hafa áhrif á afhendingargetu á heitu vatni til íbúa á Höfn, né á vatnsforða svæðisins.

Þetta er tryggt með svokallaðri niðurdælingu sem þýðir að allt vatn sem fer til lónsins fer í gegnum varmaskipti og verður dælt niður í jarðhitakerfið aftur og þannig endurnýtt,“

segir Magnús Þór Ásmundsson forstjóri RARIK.

Gott samstarf við nærsamfélagið frá upphafi

Bláa Lónið hf. vinnur nú að metnaðarfullri uppbyggingu í ferðaþjónustu víða um land þar sem sjálfbærni, virðing fyrir náttúrunni og ávinningur fyrir nærsamfélagið eru lykilþættir. Félagið vill stuðla að uppbyggingu ferðamannastaða utan hefðbundinna viðkomustaða og eiga þannig þátt í því að styðja við greinina í heild sinni sem og jafna álag og aðgengi um allt land.

Markmiðið er ætíð að hafa jákvæð áhrif með verkefnum sínum á nærsamfélagið á hverjum stað og eiga í góðu og uppbyggilegu samstarfi við hagaðila.

Grímur Sæmundsen, forstjóri Bláa Lónsins hf.:

„Það er okkur afar mikilvægt að fara vel með þau svæði sem við njótum þess heiðurs að fá að byggja upp. Við horfum ávallt til framtíðar og leggjum mikið kapp á að horfa á heildaráhrif hverrar framkvæmdar, hvort sem þau áhrif eru umhverfisleg, samfélagsleg, rekstrarleg eða annað.

Verkefnum er aðeins hleypt af stokkunum að vel athuguðu máli og þau gildi eiga við um uppbygginguna við Hoffellsjökul.

Það er heiður að njóta trausts til að taka við svæðinu af Þrúðmari og Ingibjörgu og við leggjum mikla áherslu á að varðveita það góða starf sem hjónin hafa unnið.“

Sigurjón Andrésson, bæjarstjóri Sveitarfélagsins Hornafjarðar:

„Við fögnum þessum metnaðarfullu áformum við Hoffell. Þétt og gott samtal milli Bláa lónsins hf. og sveitarfélagsins hefur verið til eftirbreytni og baðlónið sem þarna mun rísa nærri stórbrotnum skriðjökli verður einstakt á heimsvísu.

Ferðaþjónusta er mikilvæg lykilstoð í atvinnulífi Hornafjarðar og við hlökkum til samstarfsins.“

Ráðgjafinn við uppbygginguna þekktur fyrir virðingu fyrir náttúru og samfélagi

Ráðgjafi Bláa Lónsins hf. við þróunar- og hönnunarvinnu uppbyggingarinnar við Hoffell verður alþjóðlega ráðgjafarfyrirtækið Arup. Fyrirtækið býr yfir einstakri þekkingu á sviði sjálfbærni og umhverfismála, og tekur eingöngu að sér verk sem það telur að hafi jákvæð áhrif á heiminn. Það er því mikill akkur í því fyrir félagið að njóta sérfræðiráðgjafar þeirra í þessu verkefni.

Mynd: aðsend