Nýr kafli hefst í sögu Noma

Starfsfólk Noma í Los Angeles, þar sem teymið hefur unnið að tímabundnu verkefni undanfarna mánuði.

Einn þekktasti veitingastaður heims, Noma, hefur tilkynnt að hann muni opna á ný í Kaupmannahöfn í ágúst næstkomandi eftir tímabundinn rekstur í Los Angeles. Um leið hefst nýr kafli í sögu staðarins þar sem ný kynslóð stjórnenda tekur við lykilhlutverkum í rekstrinum.

Undanfarna mánuði hefur teymi Noma unnið að verkefninu Noma LA, sem hefur verið afrakstur margra ára undirbúnings og samstarfs við fjölda fagfólks. Að sögn staðarins hefur verkefnið jafnframt orðið tilefni til umhugsunar um framtíðina, gildi fyrirtækisins og næstu skref.

Noma í Kaupmannahöfn, einn þekktasti veitingastaður heims.

Noma hefur í meira en tvo áratugi byggt starfsemi sína á árstíðunum og náttúrunni í kringum sig. Á síðustu árum hefur reksturinn einkennst af þremur megintímabilum á hverju ári sem hafa mótað matseðla og upplifun gesta.

Nú hyggst veitingastaðurinn feta nýja braut. Samhliða aukinni áherslu á rannsóknir, þróun og sköpun hefur ný kynslóð leiðtoga vaxið fram innan fyrirtækisins. Þetta eru einstaklingar sem hafa starfað hjá Noma árum saman og gegnt lykilhlutverki í þróun staðarins.

Við opnunina í ágúst verður rekstrinum stýrt af nýju leiðtogateymi. Mette Brink Søberg tekur við sem yfirmaður rannsókna og þróunar, Pablo Soto verður yfirkokkur og Annika de Las Heras tekur við starfi framkvæmdastjóra.

Nýja fyrirkomulagið felur í sér tólf mismunandi tímabil á ári í stað þriggja áður. Hver mánuður mun hafa sitt eigið þema og byggja á þeim hráefnum, landslagi og hugmyndum sem eru í brennidepli hverju sinni.

Forsvarsmenn Noma segja að markmiðið sé áfram hið sama og frá upphafi. Að halda áfram að kanna nýjar leiðir, læra og þróast. Ekki aðeins í því sem kemur á diskinn heldur einnig í því hvernig staðurinn er rekinn og hvernig horft er til framtíðarinnar.

„Það er gott að koma heim,“

segir í tilkynningu frá veitingastaðnum sem segist hlakka til að taka á móti gestum á ný í Kaupmannahöfn og kynna næsta kafla í sögu Noma.

Myndir: Noma