Kokkurinn Haraldur Egilsson hæstánægður með næringarnámskeiðið

Frá næringarnámskeiðinu sl. mánudag. Við borðsendann situr Berglind Lilja Guðlaugsdóttir næringarfræðingur. Lengst til vinstri standa þær Danijela Sokolov og Hólmfríður Guðjónsdóttir matráðar í frystihúsinu á Seyðisfirði. Þá eru á myndinni kokkar á Síldarvinnsluskipum, talið frá vinstri: Haraldur Egilsson, Hjörvar Moritz Sigurjónsson og Gunnar Bogason.

Sl. mánudag var haldið í Neskaupstað námskeið fyrir kokka og matráða Síldarvinnslunnar þar sem næringarfræðingurinn og Norðfirðingurinn Berglind Lilja Guðlaugsdóttir fór yfir grunnatriði í næringarfræði og ýmsar leiðir til að gera máltíðir og matarumhverfi heilsusamlegra bæði til sjós og lands.

Farið var yfir val á hráefnum, eldunaraðferðum og skipulagi í kringum máltíðir og innkaup. Berglind er klínískur næringarfræðingur, dokstorsnemi og aðjúnkt við Háskóla Íslands og hefur mikla reynslu í slíku námskeiðahaldi.

„Þetta var frábært námskeið, það er gott að fá upprifjun á næringarfræðinni og Berglind notaði mjög sniðugar aðferðir til að benda okkur á leiðir til að auka hollustuna á einfaldan hátt.

Við vorum mjög ánægð með þetta og fengum fullt af hugmyndum sem verður gaman að vinna með,“

segir Haraldur Egilsson, kokkur á Berki NK, í samtali við svn.is.

Í næstu viku verða svo netfyrirlestrar þar sem öllu starfsfólki Síldarvinnslunnar býðst fræðsla um næringu og leiðir til að bæta mataræði.

Mynd: svn.is / Smári Geirsson