Íslenskir pizzabakarar heilla Ítali

Íslenska pizzasenan hefur vakið athygli langt út fyrir landsteinana en ítalski blaðamaðurinn Alfio Mirone fjallaði nýverið ítarlega um Polselli pizzakeppnina og ferð sína til Íslands í ítalska matar- og drykkjartímaritinu Ciociaria & Cucina.

Í umfjöllun sinni lýsir Alfio Mirone þeirri þróun sem hann telur eiga sér stað hér á landi þar sem íslenskir pizzabak­arar nálgist fagið af mikilli alvöru og virðingu fyrir hráefni. Hann segir keppnina hafa sýnt skýrt að á Íslandi sé að myndast öflug pizzamenning þar sem bakarar leitist við að sameina ítalska hefð og eigin túlkun.

Sjá einnig: Fyrsta pítsakeppni á Íslandi haldin með þátttöku fremstu pítsubakara landsins

Sérstaka athygli vakti að þrettán pizzabakarar tóku þátt í keppninni og að mati Mirone endurspeglaði hver pizza persónuleika bakarans, jafnvægi í vinnubrögðum og skilning á deigi, gerjun og bakstri. Þá segir hann íslenska þátttakendur hafa sýnt mikla fagmennsku og metnað gagnvart handverkinu.

Í greininni er einnig fjallað um mikilvægi samstarfsins við ítalska framleiðandann Molino Polselli og Ó.J.&K ISAM sem sá um skipulagningu og framkvæmd keppninnar hér á landi. Alfio Mirone bendir á að verkefnið hafi ekki aðeins snúist um hráefni heldur einnig miðlun þekkingar, þjálfun og tengslamyndun milli fagfólks á Ítalíu og Íslandi.

Hann nefnir jafnframt sérstaklega framlag Paolo Parravano sem hafi gefið keppninni aukið faglegt vægi með reynslu sinni og leiðsögn. Að hans sögn snerist keppnin ekki eingöngu um bragð heldur einnig um skilning á deigi, nákvæmni í bakstri og getu pizzabakara til að laga sig að ólíkum aðstæðum og hráefnum.

Í lok umfjöllunarinnar segir Alfio Mirone að Ísland hafi komið sér á óvart. Hann segir ítalska pizzuhefð geta þróast og aðlagast nýjum aðstæðum án þess að missa uppruna sinn og telur íslensku pizzasenuna vera á réttri leið.

Hægt er að skoða tímaritið í heild sinni með því að smella hér.

Mynd: Skjáskot úr ítalska tímaritinu