Um 60 gestir á bransahittingi Ó.J&K – ISAM á Akureyri

Ó.J&K – ISAM stóreldhús bauð til veislu og bransahittings á Akureyri í liðinni viku. Um 60 gestir lögðu leið sína á viðburðinn þar sem boðið var upp á fjölbreyttar veitingar og tækifæri til að kynna sér vörur og starfsemi fyrirtækisins.

Guðmundur Geir Hannesson, matreiðslumaður og sölumaður Ó.J&K – ISAM stóreldhús á Norðurlandi, hafði veg og vanda af skipulagningu viðburðarins.

Gestir gátu smakkað á fjölbreyttum veitingum, skoðað vöruúrval fyrirtækisins og átt ánægjulega stund með kollegum úr veitingageiranum.

Að sögn aðstandenda tókst viðburðurinn afar vel og var ánægjulegt að sjá hversu margir lögðu leið sína á staðinn.

Fimm hundruð gestir fögnuðu 30 ára afmæli Lostætis

Guðmundur Geir hafði einnig veg og vanda af skipulagningu 30 ára afmælishátíðar Lostætis, veislu- og veitingaþjónustu, sem haldin var í mötuneyti Alcoa Fjarðaáls í byrjun september.

Um 500 gestir tóku þátt í hátíðarhöldunum þar sem götumatargerð, eða Street Food, var í aðalhlutverki. Boðið var upp á fjölbreyttar kræsingar og var matseðillinn sérlega girnilegur.

Á meðal rétta voru taco með rifnu andakjöti, litlir hamborgarar, bao-bollur með rifnum svínabóg og kjúklingaspjót með satay-sósu. Með réttunum var meðal annars boðið upp á sterkt majónes og fjölbreytt meðlæti.

Afmælishátíðin var því sannkölluð matarveisla þar sem gestir fengu að njóta fjölbreyttra rétta í tilefni þessara tímamóta hjá Lostæti.

Myndir: Facebook / Ó.J&K – ISAM stóreldhús