Helga Signý sigraði í Barlady keppninni í annað sinn – Myndir

Sigurkokteillinn Ratatouille tryggði Helgu Signý Sveinsdóttur sigur í Barlady keppninni í annað sinn.

Úrslit Barlady kokteilakeppninnar á Íslandi fóru fram síðastliðinn miðvikudag, þar sem keppendur kepptu um réttinn til að fara fyrir hönd Íslands í alþjóðlegu Barlady keppninni sem fram fer á Corfu í Grikklandi dagana 6. – 8. mars næstkomandi.

Sigurvegari keppninnar árið 2026 er Helga Signý Sveinsdóttir frá Tipsý með kokteilinn Ratatouille, sem hlaut hæstu heildareinkunn dómnefndar.  Í öðru sæti varð Kría, einnig frá Tipsý, með drykkinn Tom and Berry, og í þriðja sæti Brynja Ploy frá Jungle með kokteilinn Dang Gui.

Helga Signý Sveinsdóttir að störfum á barnum þar sem dómnefnd mat frammistöðu keppenda í Walk-Around fyrirkomulagi Barlady keppninnar.

Helga Signý vann einnig keppnina árið 2024 og er þetta því í annað sinn sem hún stendur uppi sem sigurvegari. Úrslitin voru tilkynnt við lokahóf sem haldið var á Veður sama kvöld.

Sjá einnig: Helga á Tipsý kom sá og sigraði í Barlady keppninni

Barlady keppnin er haldin af Barþjónaklúbbi Íslands (BCI) í samstarfi við Samtök Íslenskra Eimingarhúsa (SÍE) og hefur það að markmiði að efla fagmennsku, sýnileika og þátttöku kvenna og kvára í barþjóna geiranum á Íslandi. Keppnin fór fram í svokölluðu „Walk-Around“ fyrirkomulagi þar sem dómnefnd heimsótti vinnustaði keppenda og mat frammistöðu þeirra á heimavelli.

Dómarar fylgjast grannt með frammistöðu keppenda. Frá vinstri eru Eva María Sigurbjörnsdóttir, Brynja Hovdenak, Alba E. H. Hough, Ashley Marriot og Catherine Rivadeneyra.

Eftirfarandi eimingarhús tóku þátt í keppninni í ár: Eimverk Distillery, Hovdenak Distillery, Reykjavík Distillery og Brunnur Distillery, sem með þátttöku sinni leggja mikilvægt framlag til þróunar og eflingar íslenskrar kokteilamenningar. Í dómnefnd sátu Alba E. H. Hough frá Brunni, Eva María Sigurbjörnsdóttir frá Eimverki, Brynja Hovdenak frá Hovdenak, Catherine Rivadeneyra frá Reykjavík Distillery og Ashley Marriot, sigurvegari alþjóðlegu Barlady keppninnar frá því í fyrra.

Alba E. H. Hough dómari smakkar einn af keppniskokteilunum í Barlady keppninni.

„Barlady keppnin er mikilvægur vettvangur til að varpa ljósi á þá miklu fagþekkingu og sköpunarkraft sem finna má meðal kvenna og kvára í bar geiranum á Íslandi.

Frammistaða keppenda í ár var afar glæsileg og við hlökkum til að fylgjast með Helgu Signý keppa fyrir Íslands hönd á alþjóðlegum vettvangi,“

segir Teitur Riddermann Schiöth, forseti Barþjónaklúbbs Íslands.

Teitur Ridderman Schiöth forseti Barþjónaklúbbs Íslands
Mynd: úr safni

Sigurvegari íslensku keppninnar árið 2025 fór alla leið og sigraði alþjóðlegu úrslitin, þar sem Ashley Marriot bar sigur úr býtum. Nú mun Helga Signý fara fyrir hönd Íslands á Corfu, þar sem keppendur frá fjölmörgum löndum heims etja kappi um Barlady heimsmeistaratitilinn 2026.

Frekari upplýsingar um alþjóðlegu keppnina má finna á www.barlady.net.

Meðfylgjandi myndir tók Hákon Freyr Hovdenak.