César Ritz flytur yfir til Opna háskólans | Breytingar í Hótel og matvælaskólanum í haust

Hótel og matvælaskólinn í Menntaskólanum í Kópavogi

Baldur Sæmundsson

Með haustinu mun hótelnámið César Ritz Colleges flytja yfir til Opna háskólans, en námið hefur verið kennt í Hótel og matvælaskólanum í MK síðastliðin ár.

Við byrjum með nýja grunndeild „Grunndeild matvæla- og ferðagreina“ sem er hugsuð fyrir nemendur á aldrinum 16 til 20 ára. Við erum líka með nýja útgáfu af matsveina/matartæknanámi en nú er það nám kennt saman og útskrifast matsveinar eftir tvær annir en matartæknar eru önn lengur,

sagði Baldur Sæmundsson áfangastjóri verknáms í Hótel og matvælaskólanum í samtali við veitingageirinn.is, aðspurður um breytingarnar í skólanum næstkomandi haust.

Mikil aukning hefur orðið í framreiðslu náminu, en 13 framreiðslumenn útskrifuðust nú í maí. Hér afhendir Margrét Friðriksdóttir skólameistari burtfaraskírteini.

Nú í maí fóru fram skólaslit og brautskráning í Hótel og matvælaskólanum við hátíðlega athöfn í Digraneskirkju í Kópavogi.

Þá útskrifuðust 8 bakarar, 13 framreiðslumenn og 22 í matreiðslu og 3 úr hótelstjórnunarnámi César Ritz. Að auki útskrifuðust 21 úr meistaranámi og 5 úr iðnstúdentsnámi en það er námsmöguleiki fyrir þá sem lokið hafa iðnnámi að sækja sér stúdentsnám.

Íris Björk Óskarsdóttir sem brautskráðist úr bakaraiðn hlaut viðurkenningu fyrir góðan námsárangur.
Mynd: kornax.is

Nýsveinninn Íris Björk Óskarsdóttir sem brautskráðist úr bakaraiðn hlaut viðurkenningu fyrir góðan námsárangur í iðnnámi frá Rótarýklúbbnum Borgir í Kópavogi. Þá hlaut hún einnig viðurkenningu úr Viðurkenningarsjóði MK og bókarverðlaun fyrir árangur í bakaraiðn.

Við Digraneskirkju í Kópavogi að lokinni útskrift